.png)
Covalima (RCCT)-16-07-24-Diretór Ezekutivu Ospital Referal Suai, Domingos de Fatima Oliveira Lemos, kompromete sei tau planu ba orsamentu 2025 atu hadi’a kondisaun no aumenta fasilidade iha sala maternudade ospital suai ne’ebé sei menus liuliu konaba kama tanba durante la sufiente hodi atende inan isin rua sira ne’ebé mai partu.
Domingos de Fatima Oliveira Lemos, hatete durante ne’e Hospital Referal Suai iha de’it kama 14, tan ne’e la sufsiente hodi responde ba inan isin rua sira mai partu.
“Iha maternidade ne’e ospital prepara kama 8 de’it maibe realidade ita aumenta tan, tanba nesesidade hare husi inan isin rua sira mai partu barak dala ruma kama bele la to’o, tan ne’e foin lalais ami aumenta tan kama 6 ne’ebé oras ne’e daudaun halo kama 14, ita nia kondisaun maka hanesan ne’e, tanba ne’e maka iha planu oin mai oinsa bele hadi’a kondisaun hirak ne’e, bainhira hare ba kondisaun, tuir planu aksaun annual 2025 fasilidade hospital sei tau orsamentu hodi hadi’a kondisaun hirak ne’ebé ospital infrenta, kada loron ne’e inan isin rua sira sempre mai partu hela de’it dala ruma mos tranfere husi sentru saude sira mai iha ospital referal no dala ruma inan isin rua sira familia lori mai rasik, ne’e hanesan kondisaun ida ne’ebé presija atu hare no hadi’a nune’e inan isin rua sira mai partu labele halerik ba toba fatin” dehan Diretór Ezekutivu Hospital Referal Suai, Domingos de Fatima Oliveira Lemos.
Nia afirma maske durante fasilidade iha sala maternidade ladun kompletu maibe hanesan dirijente nafatin responsabilidade hodi esforsu buka maneira hodi halo atendementu ba inan isin rua sira ne’ebé mak atu mai partu.
“Nudar responsavel masimu iha ne’e ami tenta oinsa inan isin rua sira mai partu atu sira bele asesu ba fatin hodi halo atendimentu, tan ne’e husu ba inan isin rua sira bainhira mai atu partu karik hasoru kondisaun hanesan ne’e husu ita nia pasiensia, atu bele kopera ho parteira sira atu nune’e ita bele halo atendimentu servisu ho di’ak, tanba ita nia kondisaun maka hanesan ne’e, ita labele buat hotu hanesan ema fila liman halo di’ak derepente deit maibe presija prosesu naruk” nia dehan.
Entertantu Diretór Ezekutivu Hospital Referal Suai, Domingos de Fatima Oliveira Lemos, husu ba komunidade tomak iha Covalima liliu ba inan isin rua sira bainhira mai partu iha Hospital Referal Suai atu pansensia hodi hasoru situasaun atual ne’ebe iha, maibe hanesan lideransa iha ospital ida ne’e sei nafatin esfrosu hodi buka solusaun no rejolve situasaun inkompletu fasilidade ne’ebé ospital referal suai infrenta dadaun.
Jornalista : Julio Salinas
