Covalima (RCCT) 25-01-24-Hahu husi fulan Janeiru to’o Dezembru 2023 Diresaun Munisipal Transporte Komunikasaun (DMTK) Munisipiu Covalima konsege rekolla reseitas ba kofer estadu ho monante $ 76.322,50.
Diretór DMTK Munisipiu Covalima Joaquim Gusmão, ba jornalista sira hatete iha tinan ida nia laran konsege halibur osan ho montante $ 76.322,50 ne’e mai husi halo inspeksaun ba veiklus, renovasaun ba karta kondusaun, renovasaun ka lisansa trajetu no rejistu ba veikulus.
“Husi Diresaun Munisipal Transporte Komunikasaun Munisipiu Covalima hahu husi Janeiru-Dezembru 2023 nia reseitas hamutuk dolar Amerikanu rihun hitu nulu resin neen, atus tolu rua nulu resin rua sentavus lima nulu ($ 76.322,50), iha reseitas ne’e ita hetan mai husi halo inpeksaun ba veiklus, renovasaun ba karta kondusaun no renovasaun ka lisensa ba trajetu, rejistu ba veiklus inklui xapa lakon no troka xapa matrikula husi atividades hirak ne’e mak iha tinan ida nia laran ita konsege rekolla reseitas hodi hatama ba kofer estadu ho montante ida hanesan ne’e” nia dehan.
Nia subliña, reseitas ne’ebé Diresaun Munisipal Transporte Komunikasaun Munisipiu Covalima rekolla osan iha tinan 2023 barak liu kompara ho tinan 2022 nian nune’e nia garantia iha tinan 2024 sei aumenta reseitas iha Covalima.
“Iha 2023 ne’e barak liu kompara ho 2022 nian, tanba iha tinan 2022 nian ne’e ita konsege rekolla orsamentu ho montante rihun $ 60 resin deit, maibe iha tinan 2023 nian ne’e ita konsege rekolla sae to’o iha $ 76.322,50” nia esklarese.
Entertantu tuir Diretór Diresaun Munisipal Transporte Komunikasaun Munisipiu Covalima Joaquim Gusmão, garantia katak ba tinan 2024 sei servisu maka’as hodi hetan reseitas bo’ot liu duke tinan 2023.
Jornalista : Julio Salinas
Editor : Chamot Nahac
