COVALIMA—-Cordenador WFP Munisípiu Covalima, Amandio Jacob da Silva, hateten governu Japaun distribuisaun ai-han ida ne’e hakarak atu hadiak nutrisaun inan isin rua no inan fo susu bebe.
“Governu Japaun distribui ai-han han ida ne’e ho nia objetivu atu ajuda hadiak nutrisaun inan isin rua no inan fo susu bebe, atu nune’e bele fo ai-han ne’ebe nutritivu ba iha inan sira ajuda bele mellora nutrisaun” informa Cordenador WFP Munisípiu Covalima, Amandio Jacob da Silva ba jornalista sira iha edifisiu Solidariedade Sosiál Munisípiu Covalima Kuarta (11/01).
Amandio dehan objetivu ida seluk atu enkoraza inan sira atu kontinua konsumu ai-han ne’ebe nutritivu variedade atu nune’e bele hadiak nutrisaun inan no mos ba bebe nian.
“Iha distribuisaun ne’e ita tajetu ba munisipiu sira ne’ebe mak iha dadus nutrisaun ho problema ba iha mal-nutrisaun, ne’ebe distribuisaun ida ne’e ba iha munisipiu 6 hanesan Munisipiu Covalima, Ermera, Baukau, Dili, Manufahi no Manatutu, tanba Munisípiu 6 ne’e dadus hatudu katak mal-nutrisaun aas kompara ho munisipiu sira seluk” nia dehan.
Amandio informa mal-nutrisaun bazeia stantin iha dadus survey hand nutrisaun iha 2020 hatudu katak pursentu 49 maka ho kategoria stantin ka raes badak.
“Distribuisaun ida ne’e ita tarjetu ba suku hotu ne’ebe mak iha munisípiu nia laran ne’ebe ita iha Covalima suku 30 ne’ebe ita distribui ai-han ne’e ba suku 30 ne’e hotu, liliu ba inan isin rua no inan fo susu ba bebe ne’ebe prienxe rekezitus” nia haktuir.
Nia realsa mekanismu apoiu WFP hetan apoiu husi Ministeriu Solidariedade Sosiál, kolaborasaun ho autoridade lokal, parte seguransa liu husi Official Polisia Suku (OPS), lider komunitaria sira pasa informasaun ba iha komunidade liliu ba inan isin rua no inan fo susu bebe hodi mai simu ai-han refere.
Servisu ida ne’e mos kolabora ho parte saude hodi halo rejistu no halo verifikasaun ba inan isin rua no inan fo susu ba bebe ba sira nia dadus karik balu sei dauk vasina inan sira balu mak sei dauk kompleta dokumetu balu parte saude halo kompleta depois sira ba rejista fali MSSI hodi distribui ai-han ba inan sira ne’e.
Entertantu programa ida ne’e realiza tanba hetan suporta husi governu Japaun liu husi programa ai-han mundial, servisu hamutuk ho MSSI ho apoiu foos, mina tein ho koto, ne’ebe ema bolu dehan pakote ai-han nutritivu, foos kilo grama 45, koto kilo grama 6 ho mina tein 5 litru-1.(Azu)
