Covalima (RCCT) 03-10-23–Administrador Munisipiu Covalima Francisco de Andrade hatete Covalima oan hotu-hotu tantu funsionariu, veteran, polisia no F-FDTL inklui povu babain tenki fo kontribuisaun hodi konstrui santuariu ba Amo na’in no Sarani sira iha Igreja Ave Maria Suai, ne’ebé mate iha loron 6 fulan Setembru 1999 liu ba.
Administrador Munisipiu Covalima Francisco de Andrade hato’o lia ne’e iha nia intervensaun wainhira partisipa enkotru ne’ebé realiza husi Komisaun Organizador Setembru Negro Suai hodi foti desizaun, kada funsionariu ida iha Covalima tenke fo kontribuisaun osan ho montante $ 10 ba konstrusaun santuariu Relijioza Setembru Negro Suai no Estatua Padre Na’in-3 nian.
“Iha ne’e ha’u bele foti desizaun kada funsionario ida kontribui $ 10, ha’u lakohi hare ba nivel, kuandu ita hare ba nivel bele diskute naruk, ita konsiente katak durante ukun an di’ak no at ne’e ita goza ona mais kuitadu sira ne’ebé mate, maske sira esforsu tomak lori isin ho ran mak sosa ukun an ida ne’e, tan ne’e ita sira ne’ebé moris dignifika oinsa temi netik sira nia naran liu husi buat sira haensan ne’e” Administrador Munisipiu Covalima Francisco de Andrade esplika iha salaun enkontru Igreja Ave Maria Suai.
Sekretariu Kombatentes Libertasaun Nasional Munisipiu Covalima Joaquim Barros hatete kada tinan sempre komemora massakre setembru negro, maibe iha selebrasaun ba tinan 25 (tahun Perak) tenki hala’o ho uniku no diferensia.
“Tinan-tinan ita hala’o hela selebrasaun, maibe ba selebrasaun tinan 25 nian ne’e ita hakarak halo buat ida maka ohin ita halibur malu iha fatin ida ne’e tau hamutuk hanoin hodi marka diferensia uitoan, ne’e mak ita bolu malu hodi tau interese as setembru negro nian” nia dehan.
Relasiona ho Sorumtu ne’e, Prezidenti Komisaun Setembru Negro Suai, Domingos Oliveira “Foti Riba” hatete Komisaun halibur ema hotu hanesan Covalima oan atu fo hanoin ba malu hodi ba prepara konstrusaun santuariu no komemora tinan 25 tragedia 6 setembru 1999 ne’ebe rejulta amo na’in 3 no sarani lubuk ida lakon sira nia vida iha igreja ave maria suai.
“Ita mai hamutuk nudar Suai oan lolo liman ba malu, fo hanoin ba malu atu prepara ba konstrusaun santuariu ida ne’e, tinan 25 husi tinan 24 ita halo misa oinsa tan ne’e ita sira ne’ebé hamutuk tau hanoin ba malu atu uitoan ka barak ita atu harii santuariu ne’e, tanba ita sira ne’ebé moris halo kobta istoria id aba setembru negro nian, sira nia mate maka ita nia moris, saida maka ita atu halo ba Amo na’in-3 no ba sarani sira iha Covalima ia ne’e” nia dehan.
Entertantu objetivu husi enkontru ida ne’e komisaun deside liu Administrador Munisipiu Covalima foti desizaun kada funsionariu, veteranus, polisia no forsa kada ema kontribui osan ho montante $ 10, enkuantu iha sorumutu ne’e mos komisaun deside populasaun Covalima kada uma kain tenke kontribui osan ho montante $ 2.
Jornalista : JS
Editor : CN
