Covalima (RCCT) 22-01-25- João Martins konsidera total orsamentu hamotuk dolar amerikanu rihun atus ida sanulu resin ida, atus sia nen nulu resin lima ($ 111, 965.00) ne’ebé aloka ba Servisu Munisipal Protesaun Sivil no Jestaun Dezastre Naturais (SMPSJDN), Munisipiu Covalima la sufisiente hodi jere hodi implementa programa siguransa nasional ho sub programa rua ne’ebé kabe ba atividade nen.
Diretór SMPSJDN João Martins dehan, orsamentu hamotuk $ 111, 965.00 ne’e la sufisiente tanba kada tinan sempre akontese dezastre ho volume ne’ebé bo’ot iha munisipiu Covalima. Maibe João Martins sei esforsu atu buka fundus husi parseiru, hodi responde ba nesisidade komunidade nian wainhira mosu dezastre.
“Husi orsamentu ne’ebé ami simu ne’e la sufsiente tanba kada tinan dezastre mosu iha Munisipiu Covalima mai ho nia numeru ne’e bo’ot tebes, maibe ami mos esforsu an oinsa komunidade sira ne’ebé hetan afetadu husi dezastre ne’e prontu nafatin hetan apoiu emerjensia, ami nafatin koordena ho ami nia parseiru sira tau hamutuk forsa bele fo apoiu emerjensia ba komunidade sira ne’ebe hetan dezastre no ami mos responde tuir nesesidade ka kbi’it ne’ebe iha” Diretór Servisu Munisipal Protesaun Sivil no Jestaun Dezastre Naturais (SMPSJDN), Munisipiu Covalima, João Martins, informa.
Maske Nune’e, Governu Timor Leste liu husi Orsamentu Jeral Estadu (OJE) kontinua Finansia Servisu Munisipal Protesaun Sivil no Jestaun Dezastre Naturais (SMPSJDN), hodi sustenta implementasaun atividade prevensaun dezastre, mitigasaun ba area risku no mos halo sosializasaun no fahe informasaun ba komunidade sira konaba dezastre naturais.
“Iha tinan 2025 Servisu Munisipal Protesaun Sivil no Jestaun Dezastre Naturais (SMPSJDN), Munisipiu Covalima, hetan alokasaun orsamentu ho montante $ 111, 965.00 ne’e ba iha programa siguransa nasional no iha sub programa rua ho atividade 6, no planu prioridade ba tinan ida ninian liliu halo prevensaun no mitikasaun ba iha area risku sira, liu husi informasaun fahe brosura ho mos ami sei produs manual risku jestaun dezastre ne’e ba kada suku nune’e sira bele hatene oinsa bele halo jestaun risku dezastre ba iha sira nia aldeia ka suku sira hela ba” tenik João.
Enkuantu tuir Diretór Servisu Munisipal Protesaun Sivil no Jestaun Dezastre Naturais (SMPSJDN), Munisipiu Covalima, João Martins, dehan husi orsamentu ne’ebé aloka sei utiliza mos hodi halo prevensaun ba area protezidu sira, hanesan, servisu hamotuk ho komunidade sira atu hamos area protezidu ai kamelin iha Postu Administrativu Tilomar.
Jornalista : Julio Salinas
Editor : Chamot Nahac
