COVALIMA—-Autoridade iha Munisípiu Covalima rekolla ona dadus provizóriu hatudu iha uma kain-79 maka hetan estragus hafoin akontese monu anin bo’ot iha teritoriu laran tomak inklui Covalima.
Sekretariu Munisipiu Covalima Francisco de Jesus Alves, hateten hafoin ekipa tun ba iha terenu hodi rekolla dadus kona ba uma hira mak hetan estragus iha ambitu akontese anin boot ida ne’e konsege rekola provizoriu uma kain-79 mak anin sobu.
“Ami hakarak relata ba ita boot sira katak relasiona ho akontesementu anin bo’ot ne’ebe hahu iha loron 27 fulan Dezembru 2022 to’o 3 de Janeiru 2023 ekipa hala’o levantamentu ida ne’e provizoriu dadus hatudu iha uma kain-79 maka hetan estragus” deklara Sekretariu Munisipiu Covalima Francisco de Jesus Alves, ba jornalista liu husi konferensia imprensa ne’ebe hala’o iha salaun Administrasaun Munisípiu Covalima sesta (06/01).
Sekretaria Munisípiu Munisípiu ne’e afirma tuir previjaun metrologia Timor-Leste nian hatudu katak akontesementu anin bo’ot sei to’o iha dia 9 de Janeiru 2023.
Rezultadu husi anin ho velosidade maka’as durante ne’e hodi estragus komunidade nia uma hela fatin, liu husi ekipa verifikasaun halo levantamentu dadus ba estragus sira mak hanesan total dadus verifikasaun iha posti administrativu 7 kompostu husi suku 30, hahu husi loron 27 de Dezembru 2022-3 de Janeiru 2023, hanesan iha Postu Administrativu Zumalai total uma kain 30 mak at, maibe ne’e iha kategoria 3 hanesan at kman, at naton no at total.
Iha suku Zulo iha uma kain-12, Suku Raimea uma kain-13, Suku Tashilin uma kain-4 no suku Lepo uma kain-1 ne’e pertensia ba iha Postu Administrativu Zumalai nian.
Postu Administrativu Fohorem total uma kain-24 maka hetan estragus, kompostu husi Suku Fohorem uma kain-8, Suku Laktos uma kain-4 no suku Dato-Tolu iha uma kain-12, iha postu Administrativi Maucatar total uma kain-9, suku Holpilat iha uma kain-5, Suku Matai uma kain-2 no Suku Belekasak uma kain-2.
Postu Administrativu Fatululik total uma kain ne’ebe at iha 11, Suku Taroman iha uma kain-10 no suku Fatululik iha uma kain-1, Postu Administrativu Suai total uma kain-2 maka hetan estragus kompostu husi Suku Debos uma kain-1 no Suku Labarai uma kain-1.
Postu Administrativu Tilomar total uma kain-2 maka at hanesan iha Suku Lalawa uma kain-2, Postu Administrativu Fatumea iha uma kain-1 mak hetan estragus iha Suku Nanu.
Rezultadu total mak hanesan at total iha uma kain-26, at naton iha uma kain-14 no at kman iha uma kain-39, total husi rezultadu ne’e mak hamutuk uma kain-79 iha Postu Administrativu 7, Munisípiu Covalima.
Nia haktuir levantamentu dadus ida ne’e servisu hamutuk ho parseiru sira mak hanesan CVTL Fial Covalima, Marsycorps Servisu Munisipal Jestaun Dezastre Naturais no Protesaun Sivil no mos autoridade protesaun sivil Munisípiu Covalima ninian.
Nia dehan dadus ida ne’e hanesan dadus provizoriu ne’ebe levanta husi ekipa ida ne’e, maibe sei iha kontinuasaun levantamentu dadus tanba agora daudaun mos kontinua akontesimentu iha suku balu ne’ebe maka rezulta um balu at, tanba ne’e ekipa refere nafatin halo levantamentu hodi hatene loloos dadus fiksu sei aprezenta depois anin bo’ot ne’e remata.
Sei mos iha kontinuasaun ekipa sei fo apoiu emerjensia ba vitima sira iha tempu badak nia laran hanesan apoiu material non food no food ba vitima sira iha postu no suku sira ne’ebe komunidade sira nia hela fatin hetan estragus husi anin.(Azu)
