Covalima (RCCT) 07-03-25-Atu redus risku dezastre Cruz Vermella Timor Leste (CVTL) Filial Covalima lansa kuda ai oan hamutuk 800, iha Aldeia Natardik, Suku Dato Tolu, Postu Administrativu Fohorem, Munisipiu Covalima.
Koordenador Voluntariu CVTL filial Covalima Ernestu Fereira hatete liu husi kuda ai oan ne’e bele hametin rai hodi preve erosaun ne’ebé sempre akontese no mos satan netik anin ne’ebé kada tinan sempre sobu komunidade nia uma iha Aldeia Natardik.
“Objetivu husi Cruz Vermella Timor Leste Filial Covalima ho protesaun sivil ho Xefe Suku ho Komunidade sira kuda ai ona sira ne’e atu prevene rai sira ne’ebé mak halai iha Aldeia Natardik tanba tinan tinan halai bebeik, atu redus mos anin tanba tinan tinan mos estraga komunidade sira nia uma no ai horis sira. kuda ai oan ne’e ita fiar katak ai sira ne’e bele moris di’ak hodi nune’e rai sira ne’ebe halai ne’e ba oin sai metin fali hodi nune’e ita nia komunidade sira ne’ebé hela besik rai halain ne’e senti moris ho seguru” Koordenador Voluntariu CVTL filial Covalima Ernestu Fereira, esplika.
Xefe suku Dato Tolu, Eduardo Benjamin Loro rekuñese kada tinan sempre akontese erosaun, tan ne’e pesija kuda ai oan hodi prevene dezastre ne’ebé afeta komunidade sira.
“ohin loron ita hamutuk ho Komisaun Jestaun Risku Dezastre Suku KJRDS hamutuk ho autoridade sira halo lansamentu kuda ai oan iha ne’e tamba tinan tinan rai halai hela deit ho nune ohin ita kuda ona ai oan sira ne’e hodi nune’e bele prevene komunidade sira ne’ebé mak hela besik rai refere” Xefe Suku Dato Tolu Eduardo Benjamin Loro, dehan.
Juventude Suku Dato Tolu Deonisio Cardoso da Costa, dezestre bele akontese iha kolker tempu hodi afeta ba komunidade sira, tan ne’e nia apresia CVTL ninia programa konaba prevensaun Dezastre Naturais.
“Hanesan Juventude senti orgullu ho programa ne’ebé parseiru CVTL sira halo katak ita kuda ai oan signifika katak ohin loron nia tenki di’ak maibe ida ne’e hanesan fini di’ak ida ba Dato Tolu ne’e hanesan ita prevene dezastre tanba dala barak dezastre ne’e ita la espera tanba derepente udan, rai halai no mos derepenti anin bele estraga komunidade uma, ho ida ne’e hanesan Juventuda apresia no kontenti tebes hodi bele prevene dezastre” Juventude Suku Dato-Tolu Deonisio Cardoso da Costa.
Entretantu ai oan ne’ebé mak CVTL Filial Covalima ho Parseiru sira oferese ba Suku Dato Tolu hamutuk hun 800 ne’e kompostu husi Ai mahoni hamutuk hun 400 Ai kakeu hun 200 Ai Sarian hamutuk hamotuk hun 200 .
Jornalista : Alfredo Barreto
Editor : Chamot Nahac
