.png)
Xefe Delegasaun Teritorial Floresta Munisipiu Covalima, Domingos Gusmão informa maske konktratu hotu iha Dezembru 2023 maibe Guarda Floresta kazuais na’n 31 ne’e sei tama servisu hanesan babain hodi hein kontratu foun mak hahu fali halo patrullamentu iha terenu.
“Ita iha Guarda Floresta na’in31 ho tekniku ida, maibe husi sira ne’e maioria iha kontratu deit hanesan kazuais ne’ebé oras ne’e daudaun sira sei labele hala’o servisu hanesan baibain maibe sira sei hein hela informasaun husi Diresaun Nasional Floresta tanba sira nia kontratu remata ona iha fulan Dezembru 2023, entaun sira sei para hela, ne’ebé loro loron sira mai kantor hanesan ne’e deit, sira seidauk bele hala’o k’nar servisu tanba bazeia ba sira nia kontratu ne’e seidauk iha, maibe diresaun nasional sei esforsu maka’as para oin nusa maka sira bele kontinua sira nia servisu, tanba floresta ne’e area ida ne’ebé luan, Floresta ne’e iha suku no aldeia tanba ne’e husu ba iha nasional atu bele aselera lalais ba sira nia kontratu ne’e” Xefe Delegasaun Teritorial Floresta Munisipiu Covalima, Domingos Gusmão, dehan ba RCCT iha nia k’nar fatin Segunda (29/01).
Nia afirma, prosesu konaba kontratu ne’e diresaun nasional mak hantene liu, nune’e munisipiu hein deit rezultadu.
“Ha’u hanoin diresaun nasional maka sei prosesu hela, oin nusa maka ema sira ne’e bele kontinua, ami iha munisipiu hein deit tanba buat hotu nasional sira maka prosesu sira nia kontratu, tanba sira ne’e kazual, sira kontinua mai nafatin iha ne’e hodi hein sira nia kontratu para hodi aselera sira nia servisu ba iha terenu, planu ne’e diresaun nasional maka sei toma konta, tanba guarda floresta ne’e sira nasional maka halo rekrutamentu ne’ebé prosesu ne’e diresaun nasional sei halo prosesu ida ne’e” nia esplika.
Enkuantu tuir Xefe Delegasaun Teritorial Floresta Munisipiu Covalima, Domingos Gusmão, fundamenta kompetensia atu kontinua fo kontratu ba Guarda Floresta iha Covalima ne’e la’os iha Munisipiu maibe ne’e desizaun iha Diresaun Floresta Nasional nian.
Editor : Chamot Nahac
