“Iha biban ida ne’e hakarak hato’o ba Vise Ministru Fortalesimentu Instituisional Saude katak Munisipiu Covalima kompostu husi Postu Administrativu 7, Suku 30 Aldeia 148, ho nia populasaun hamutuk rihun 73.190, iha postu hotu-hotu servisu saude ninian ita iha ona sentru saude sira ne’ebé ita estabelese hotu ona iha Postu 7 no mos iha suku balu ne’ebé maka izoladu ita iha hotu ona, so ke ita sei hasoru problema uitoan maka ita menus rekursu umanu no mos ekipamentu atu hodi halo atendimentu ba servisu saude nian iha Munisipiu Covalima” informa Sekretariu Munisipiu Covalima Francisco de Jesus Alves iha nia diskursu hafoin partisipa iha lansamentu distribuisaun suplementu sulfatu ferru no asidu foliku ba feto adelexente ho idade husi 12-16 iha Munisipiu Covalima ne’ebé lansa husi Vise Ministru Fortalesimentu Instituisional Saude, Jose dos Reis Magno, iha Eskola Baziku Central Ladi, Suai, Sabadu (02/12).

Hatan ba kestaun ida ne’e Vise Ministru Fortalesimentu Instituisional Saude, Jose dos Reis Magno, rekuñese fasilidade saude barak maka sei menus ekipamentu no rekursu umanu.

“Loos ne’e ami hatene, tan ne’e maka hori kalan ha’u to’o mai halo kedas reuniaun ho Diretora servisu saude Covalima mensiona mos kestaun sira hanesan ne’e, loos ita haree organizasaun mundial saude nian katak populasaun rihun 10 tenki iha ema pelu menus ema 48 profesional saude maka hala’o servisu hodi oferese kuidadu saude ba populasaun rihun 10 ne’e, maibe situasaun ita nian maka ne’e 48 ita foin to’o 46, ne’e mediu la’os hotu-hotu to’o ona 46 ne’e konta matematika nian mak hanesan ne’e, signifika katak pelumenus ema na’in 8 para atu bele kompleta ba 48 ne’e, atu nune’e ita bele ko’alia katak mesmu ninia distribuisaun talvez ladun di’ak maibe tuir nia kuantidade ne’e ema to’o ona agora ita halo nusa maka atu halo nia distribuisaun sira ne’ebé prontu para atu bele kuidadu saude ba ita nia populasaun, ne’e Ministeriu saude konsiente katak ita sei menus hela ba ne’e mais anualmente ita propoin oinsa atu bele rekruta numeru profesionais balu tan para bele prienxe daudauk” nia dehan.

Entertantu Sekretariu Munisipiu hato’o lia hirak ne’e ba Vise Ministru Fortalesimentu Instituisional Saude, Jose dos Reis Magno, iha serimonia lansamentu distribuisaun suplementu sulfatu ferru no asidu foliku ba feto adolexente ho idade husi 12-16 iha Munisipiu Covalima.

Jornalista : Julio Salinas

Editor : Chamot Nahac