COVALIMA—-Comisaun Nasional Eleisaun (sigla Portugues CNE) Sesta (02/06) feira hala’o solidaridade ba vitima insendio iha Aldeia Asu-RAi, Suku Debos, Postu Administrativu Suai, Munisipiu Covalima, insendio ne’e akontese iha Sesta semana kotuk hodi rezulta vitima Cicilia da Costa nia uma ahi han motuk total no salva sasan uma laran inklui dokumentus inportante balu,
Tuir Diretor CNE Hermengildo de Sena, informa CNE Covalima hatudu ninia sentidu solidariedade humana mai apoiu sasan uitoan ba iha vitima maske sasan ne’e labarak maibe fiar katak ho sasan uitoan ne’e bele ajuda vitima hodi sustenta netik nia ho familia iha loron id aka rua nian tuir mai ne’e.
“Ohin CNE Covalima mai iha fatin oan ida ne’e hatudu ninia sentidu solidaridade, nudar humana tanba mana ne’e hetan asidente ki’ik oan ida tanba ne’e maka husi CNE Covalima lori netik buat balu la boot liu, la ki’ik liu, la barak liu, la uitoan liu, maibe ho sentidu hatudu netik ami nia solidaridade” informa Diretor CNE Hermengildo de Sena, hafoin apoiu sanan nesesidade baziku ba Vitima Cicilia da Costa iha Aldeia Asu-Rai, Suku Debos, Sesta (02/06).
Nia haktuir ho intensaun ida ne’e maka CNE Covalima tomak mai iha ne’e lori netik buat balu ne’e prepara tuir kbiit ne’ebe iha, maske la responde ba buat hotu-hotu, maibe fo tuir buat no kbiit CNE iha.
Nia dehan vitima hanesan Ofisial Superviziona Eleisaun (OSE) serbisu iha CNE, tanba ne’e maka CNE marka prezensa iha fatin ida ne’e hodi apoiu netik aihan baku ba vitima.
Sasan mak ne’e atu barak ka uitoan la haree ba iha ne’eba maibe CNE Covalima iha fuan, iha neon hodi hatutan balu saida mak CNE iha maske buat ne’eba folin laek ida, maibe ho folin laek ne’e bele komprementa nudar familia, kolega no fo domin ba malu.
Vitima Cicilia da Costa agradese wain ba CNE ho nia estrutura tomak ne’ebe ohin bele fo netik ai han balu, maske la barak maibe sira hatudu ona sentidu solidadridade.
“Hau sente agradese ba CNE ba nia apoiu maske la barak maibe ho sira nia sentidu solidaridade mai hau nudar kolega no distribui direita husi Diretor CNE Covalima nudar aman iha durante fulan 4 nia laran ne’ebe hau mos hakman an iha CNE, sira mai hatudu domin mai hau presija tebes sira nia korazen” informa Vitima Cicilia da Costa.
Cicilia hatete ho dezastre ne’ebe nia parte hasoru hetan apoiu sasan nesesidade baziku husi protesaun civil no CVTL, akontesimentu ne’e iha loron Sesta feira, no iha loron sabadu ho domingu laos oras serbisu sira la mai, depois iha Segunda dader foin sira husi protesaun sivil ho CVTL Filial Covalima mai hodi fo apoiu food item no non food item.
Material ne’ebe husi parte protesaun sivil no CVTL fo apoiu maka hanesan foos, bikan, biti, supermi, bikan no sasan nesesidade baziku sira seluk, maibe kona-ba material konstrusaun seidauk, sira foti deit dadus.
Entertantu sasan nesesidade baziku husi CNE Munisipiu Covalima fo ajuda ba vitima insendiu maka hanesan Foos saku 4, supermi, buli chok, mina kafe tugu Buaya no sasan nesesidade baziku sira seluk.(Azu)
