Covalima (RCCT)10-05-24-Centro Nacional Chega (CNC) liu husi Divizaun Edukasaun no formasaun halo lansamento filme hatutan memoria, ne’ebé produs iha tinan 2023 hodi promove aprendizazem interjerasional liu husi transmisaun memoria husi vitima no sobrevivente, atu foinsae sira bele hatene memoria moruk ne’ebé akontese iha tinan 1975 no 1999.
Reprezentante Centro Nacional Chega Matias do Santos hateten, liu husi lansamentu filme hatutan memoria ne’e, inan aman sira bele konta hikas akontesementu moruk ne’ebé liu ona.
“Liu husi forma ida ne’e ohin inan feton balun ne’ebe mak tinan barak lakoi kolia sai sira nia istoria ho ida ne’e sira bele kolia sai iha programa ida ne’e intensaun ida seluk maka oinsa istoria ida ne’ebe mak akontese tia ona iha pasado lori ita mai to hetan liberdade ne hodi transmite hela ba zerasaun foun sira atu nune’e bele la’o tuir atu nune’e sira hatene buat ne’ebe akontese iha pasadu atu labele akontese iha future mai atividade ida ne’e tinan tinan halo atividade ida kona ba video hatutan ne servisu hamutuk ho parseiru GAZ halo atividade ita ne’e no mos parseiru balu tan nomos sei kontinua iha munisipiu sira seluk ne’ebe mak seidauk” Dehan Matias.
Vitima Resinha Afonsu sente kontente bainhira konta sai istoria ne’ebé durante ne’e nia rai de’it iha nia fuan, nia dehan maske kanek iha fuan bele tomak maibe sei husik hela fitar.
“Hau sente kontente tanba liafuan hotu hotu sai ona iha publiku tanba durante husi tinan 1975 to 1999 ne saida ma kami terus ami subar ona iha ami nia laran ami fuan mak kanek agora ne’e ha’u sente diak tanba ema hotu hatene ona ami nia susar ho terus ne’e ami terus halo oinsa ema hatene ona nebe agora ha’u konta sa ona ha’u senti kontente maibe ami nia fuan ne’e kanek kanek ne’e atu diak maibe fitar sei la lakon ne’ebe ba oin ami buka dalan tan atu fitar ne lakon noa emi tau matan baa mi nia oan ho bei oan sira” nia dehan.
Entretantu Centro Nacional Chega (CNC) halo lansamento filme hatutan memoria ne’e iha salaun igreza ave maria suai, partisipa husi Prezidente Conselho Veterano, Sobrevivente sira, Diretóra Muzeum memorial Covalima, Reprezentante PNTL Covalima, Administrador postu administrativu Tilomar, Xefe suku Ogues, Estudante sira husi ESTV akar laran, ESGP Suai, Kristal, ESKAM, Inklui inan aman sira
Jornalista : Moichung
Editor : Chamot Nahac
