Covalima (RCCT) 29-12-24-Governu liu husi Sentru Lojistiku Nasionál (CLN-Sigla Portuguesa) transporta foos Saku rihun rua (2 000) hodi fa’an ba komunidade sira iha Munisípiu Covalima, kada Saku ho kilo grama rua resin lima (25kg) ho folin dolar Amerikanu sanulu resin rua sentavus lima nulu ($ 12,50).
Kordenadora CLN Intervensaun Merkado ba Covalima atual Asume Pozisaun iha CLN nudar Xefe Departamentu Administrasaun Finansas CLN Florbela Monica de Araujo, informa iha rohan fulan Dezembru 2024, CLN fa’an deit fos ba komunidade sira iha Suku Kamanasa, Suai-Loro, Debos, Ogues, Kasabauk, Labarai no Suku Matai no mos ba suku sira seluk sei kontinua iha fulan janeiru 2025.
“Tuir planu ne’ebé husi Sentru Lojistiku Nasionál, hala’o atividade liga ba Intervensaun merkadu ne’eb’e, stoke mai Covalima foos tonelada 50 hamutuk Saku 2000, ne’eb’e ho ninia kilo grama 25, presu kada Saku $12,50, iha fulan Dezembru 2024 nia rohan ne’e ami mai fa’an deit foos ba komunidade sira iha Suku Kamanasa, Suai-Loro, Debos, Ogues, Kasabauk, Labarai no Suku Matai” informa Xefe Departamentu Administrasaun Finansas CLN Florbela Monica de Araujo ba jornalista sira iha sede Suku Kamanasa, Postu Administrativu Suai, Domingu (29/12).
CLN sei kontinua fa’an foos ho folin baratu ba komunidade sira iha Postu Administrativu Fohorem, Fatumea no Fatululik iha fulan Janeiru 2025.
“Tuir loloos ami hakarak mai iha faze dala rua, maibe ita haree liga ba situasaun agora la premite ona CLN atu implementa atividade ida ne’e, maibe la’os dehan atu para ho ida ne’e, iha faze tuir mai sei iha planu atu ba liu iha Postu Administrativu Fatumea, Fohorem no Fatuliik tanba ami hare ba situasaun udan no mos kondisaun kareta ladun di’ak, konaba postu administrativu 3 ne’ebé temi ona ha’u hanoin katak iha Janeiru 2025 ami husi parte CLN sei to’o iha fatin ne’eba hodi fa’an foos refere ho folin $ 12,50 ba komunidade sira” nia dehan.
Fatin hanesan Xefe Suku Kamanasa Fernando Noronha, rekomenda ba governu liu husi Sentru Nasional Lojistiku Nasional atu kontinua halo intrevensuan hodi fa’an fos ho folin bratu ba komunidade sira.
“Ba dadaun ne’e ha’u sente kontente tanba ho CLN nia programa ida mai fa’an foos ho folin baratu, maibe ida ne’e hau sente sei la to’o tanba ha’u nia komunidade iha Suku Kamanasa populasaun barak tebes tan ne’e husu ba governu liu husi CLN ba oin bele foti tan foos lori mai atu nun’e komunidade hotu bele asesu ba sasan ne’ebé CLN fa’an, ho ida ne’e maka hanesan xefe suku rekomenda atu bele foti tan fos husi nasional mai fa’an iha Kamanasa” Xefe Suku Kamanasa informa.
Enkuantu planu governu liu husi CLN preve orsamentu ho montante millaun 3 hodi sosa foos husi nasaun Kambodia hamotuk tonelada rihun tolu nulu hodi fa’an fali ba komunidade sira ho folin baratu kada saku $ 12,50.
Jornalista : Julio Salinas
Editor : Chamot Nahac
