Covalima (RCCT) 16-08-24 Korpu Guarda Floresta (CGF-Sigla Portuguesa) Covalima, hato’o ona karta ba Ministeriu Publiku atu halo prosesu ba sidadaun balu ne’ebé halo to’os illegal iha area proteidu iha area halis suku Lalawa Postu Administrativu Tilomar.

Alende hato’o keixa ba Ministeriu Publiku hasoru sidadaun ne’ebé halo to’os illegal iha area protizidu ne’e, Korpu Guarda Foresta Covalima mos tun direta ba iha terenu hodi sobu lutu ne’ebé halo hale’u to’os kuaze hektares tolun resin.

“Tamba ne’e sasan Estadu nian no area Protezida iha lei iha ona tanba ne’e mak horseik ami kordena ona ita nia komandante operasional liga mai iha komandante Munisipiu ho Postu ne’e mak ohin mai sobu tanba ne’e, rai estadu nian ne’e la’os rai privadu, rai areas Protezidas.” Dehan Xefe Departamentu Korpu Guarda Floresta Covalima, Domingos Gusmão.

Xefe Departamentu ne’e fundamenta, Notifika bebeik ona Sidadaun ne’ebé halo to’os iha area protezidu Halis ne’e, maibe sidadaun ne’e lakohi kopera.

“Ohin loron ami realiza sobu lutu ne’e tanba komunidade ida ne’e ber ulang kali ona, ami konvida at ba kantor nia lakoi,tinan uluk ami mai sobu ona tanba ida ne’e mak ohin ami sobu ami mos fo ona karta ba iha Ministeriu Public no ami presta deklarasaun ona maibe to’o ohin loron komunidade ida ne’e sei kontinua.” Tenik Domingos Gusmão.

Entretantu rai ne’ebé kategoriza ba area protezida iha Postu Tilomar hamotuk hektares rihun nen resin akumula iha Suku Lalawa, Maudemu, Beiseuk, no Kasabauk.

Jornalista : Alfredo Barreto

Editor       : Chamot Nahac