Covalima (RCCT) 26-09-23–Prezidente Camra Comersiu Industria (CCI) Munisipiu Covalima, rekomenda ba nonu governu konstituisional liliu Ministeriu Komersio no Industria atu konstrui armajen iha fronteira Salele nune’e hodi kontrola importador sira wainhira hatama merkaduria husi Malaka NTT, Indonesia mai Covalima Timor Leste.

Prezidente Camra Comersiu Industria(CCI) Munisipiu Covalima, José do Rego Carvalho, hato’o lia hirak ne’e hafoin sorumutu ho Ministru Comersiu no Industria iha Hotel Joia Kamanasa Sabadu foin lalais

“Ami rekomenda ba governu atu konstrui armajen ida iha fronteira tuir standard export/import nian hodi nune’e bele evita kareta tronto bo’ot sira tama mai hodi estraga fali Estrada ligasaun fronteira mai Kapital, nune’e bainhira sira tama mai hatun deit sasan sira iha armajen fronteira, nune’e fo biban mos ba autoridade kompetente hodi kontrola sasan sira ne’ebé tama no sai liu husi fronteira inklui evita importir sira labele tula sasan illegal tanba armajen iha ona” nia dehan.

CCI Covalima mos husu governu atu kria lei domestiku hodi regula emprezariu Xineza ne’ebé halo negosio iha Teritoria Timor Laran tomak

“Rekomenda atu kria regulamentu ida ba Xineza sira atu kria lei domestiku ida, Xibeza sira ne’e bele fa’an deit sira nia produtu, saida Timor oan bele halo husik Timor oan bele halo, agora daudaun Timor oan tunu sate xineza sira mos bele tunu sate ida ne’e maka ami husu atu governu tau atensaun ba bat sira ne’e hodi labele hamate Timor oan” nia husu.

Konsidera ba rekomendasaun husi CCI Covalima ne’e pertenente, Ministru Komersiu no Industria, Filipus Nino Prereirra dehan governu liliu MCI sei halo kontrolu ba atividades komersiais iha fronteira.

“Sira nia rekomendasaun ne’e pertenente tebes oinsa ita bele aselera no asegura, tau iha politika nasional sei bele fo solusaun ba problema ekonomia ne’ebé ita nia nasaun infrenta, sira nia rekomendasaun ida mos kona ba regulamentu ba atividades komersiante sira ne’ebé komete husi ita nia maluk sira husi rai liur, ho informasaun sira ne’e ami sei akumula hotu depois haree hodi hametin ekonomia rai laran” nia dehan.

Entertantu Prezidente Camra Comersiu Industria Munisipiu Covalima, José do Rego Carvalho, hato’o rekomendasaun ne’e ba Ministru Komersiu no Industria Filipus Nino Pereirra, relasiona foin lalais akontese kareta tronto 4 hatama sasan husi Indonezia mai Timor Leste liu husi odamatan bo’ot Fronteira Salele mai Covalima maibe husi kareta 4 iha 2 maka tula sasan balu naran laiha lista invoce ka PEB.