Covalima (rcct) 12-03-25-Centro Comunidade Covalima (CCC) prefere komemora loron mundial feto Postu Administrativu (PA) Fatumea tanba konsidera hanesan postu ne’ebé mak ninia komunidade sira barak liu hetan kazu Violensia Domestika (VD) no Trafiku Umanu maibe la iha vitima meske nune’e komunidade sira la hato’o keixa ba parte kompetenti.
Tanba CCC Disidi Komemota Loron Mundial iha PA Fatumea ho tema Feto Prontu Lidera iha area hotu-hotu, liu husi atividade ne’e CCC fahe mos informasaun ba komunidade sira katak wainhira akontese kazu VD no Trafiku Umanu tenki relata ba autoridade hodi toma medida.
“Tuir planu ne’ebé mak ami iha katak ami eskolla iha Postu Fatumea hanesan preoridade iha ami nia programa rasik tanba tuir ami nia observasaun katak numeru ka dadus feto sira husi postu fatumea sira hetan vitima ho violensia nunka atu refere kazu ba iha nivel munisipiu ho nune’e ami enkoraza komunidade sira atu sira hatene dalan ralata kazu ba to’o iha nivel munisipiu hodi nune sira mos bele asesu sira nia direitu. Sira mos bele hetan sira nia direitu hanesan, ho ida ne’e mak ami hakarak realiza iha postu afatumea tamba postu ida ne area besik fronteira atambua indonesia” Programa Manejer Ba Programa Dezenvolvimentu Feto Rurais iha CCC, Hilaria Amaral do Carmo, dehan.
Feto potensial Postu Fatumea, Vitorina de Jesus Cardoso apresia ho inisiativa Centro Comunidade Covalima ne’ebé hala’o atividade komemorasaun loron mundial iha postu fatumea hodi fahe mos informasaun konaba violensia domestika no hapara violensia kontra feto no labarik feto.
“Agradese wa’in ba ami nia superior feto potensial Covalima hakat mai iha ne’e hato’o informasaun kanaba loron internasional feto liliu ba feto Covalima sira, espesial ba feto Postu Administrativu Fatumea hodi habelar informasaun nune’e ami nia feto maluk sira iha postu no aldeia sira bele iha kuñesimentu di’ak liu tan konaba Violensia Bazeia ba Jeneru, durante sira hasoru hela violensia maibe sira la iha kuñesimentu atu hato’o sira nia preokupasaun, maibe ho komemorasaun loron feto nian hodi habelar informasaun ba feto maluk, entaun ba ami nia feto maluk sira iha ona kuñesimentu atu hato’o keixa” Feto potensial Postu Fatumea, Vitorina de Jesus Cardoso, espresa.
Entretantu Atividade komemorasaun loron mundial feto ne’ebé realiza iha Postu Administrativu Fatumea ho tema Feto Prontu Lidera iha area hotu-hotu ne’e partisipa husi komunidade suku tolu iha Fatumea ho total partisipante atus rua resin.
Jornalista : Alfredo Barreto
Editor : Chamot Nahac
