Covalima (RCCT) 23-05-25-Centru Comunidade Covalima (CCC) liu husi programa desenvolvimentu feto rurais fahe informasaun ba komunidade sira iha Suku Matai, konaba Violensia Bazeia ba Jeneru (VBJ) no Violensia Domestika (VD) ba komunudade sira ho objetibu atu aumenta no hasa’e komunidade sira nia koñesimentu hodi redus konflitu, haburas unidade iha familia laran.
Reprezentante Diretór CCC, Amelia de Jesus husu ba komunidade sira bainhira hasoru problema violensia domestika tenki hato’o keisa ba Ofisial Polisia Suku (OPS) no mos parte relevante sira hodi nune’e bele halo prosesu tuir lei ne’ebé vigora.
“Violensia Domestika tipo hat ne’e akontese iha familia laran no iha viziñu sira karik ema hotu hotu bele hato informasaun ba iha OPS ba iha parseiru sira ne’ebé besik sira, bainhira violensia ne’e akontese karik sira mos hatene ona dalan atu halo keisa, nune’e prosesu to’o iha tribunal no mos bele halo zulgamentu iha tribunal atu nune’e ita labele moris iha violensia nia laran” Amelia de Jesus
Xefe Suku Matai Nuno Jose Mesquita Pereira, agradese ba CCC basa liu husi programa dezenvolvimentu feto rural bele hasa’e komunidade ona sira nia koñesimentu no abilidade hodi hato’o keisa ba iha instituisaun relevante sira no mos bele jere familia ne’ebé sai familia moris iha harmonizasaun.
“Agradese tebes tanba programa ida ne’e ita hare katak kolektiva tebes, liu husi aktividade ida ne’e mos ita hatene katak atu apoiu ita komunidade sira iha Aldeia no Bairo ne’ebé maka dala ruma informasaun la dun to’o. Komunidade sira mos bele iha koñesimentu ba problema no mos bele hatene dalan atu hato keisa no bele jere familia sira ne’ebé mak iha bele sai fali familia ida ne’e di’ak no harmonia” Xefe Suku Matai Nuno Jose Mesquita Pereira.
Sosializasaun konaba VBJ no VD ne’e realiza iha sede suku matai ne’ebé partisipa husi Sub-KRAM Munisipiu Covalima, RHTO, Diretór Teras no Propriedade, Xefe Suku no Konsellu Suku inklui komunidade.
Jornalista : Alfredo Barreto
Editor : Chamot Nahac
