Covalima (RCCT) 07-09-23–Centru Comunidade Covalima (CCC) Kinta feira ne’e, realiza enkontru regular ida ho objetivu oinsa atu ekonraja lider feto no mane bele fo espasu ba feto sira hodi kompete ho mane iha kualker pozisaun liliu iha eleisaun suku nian, tanba eleisaun ba eleisaun partisipasaun feto menus liu atu bele kompete ho mane sira iha eleisaun suku ne’ebe atu realiza iha Outubru 2023.
Kordenador Programa Dezenvolvimentu Feto Rurais, Centru Comunidade Covalima (CCC), Hilaria Amaral do Carmo, hateten orador ba iha enkontru regular ne’e mai husi administrasaun, xefe suku Maudemo, no pontu fokal Sekretariu Estadu Inkluzaun Munisipiu Covalima nian, husi orador na’in-3 ho objetivu oinsa atu bele motiva feto no mane sira atu suporta feto hodi compete iha eleisaun suku ne’ebe sei akontese iha fulan tinan ne’e.
Hilaria esplika Centru Comunidade Covalima iha planu atu haforsa feto potensial sira nia konesementu hodi bele Kompete iha eleisaun suku no oinsa atu promove lideransa feto sira iha Munisipiu ida ne’e.
“CCC hakarak Promove feto sira atu bele sai lideransa iha munisipiu Covalima, liu liu sai lideransa komunitaria ka xefe suku hodi lidera komunidade sira” Hilaria esplika
Xefe Suku Maudemo Maria Fatima enkoraja feto maluk sira labele tauk atu kompete ho mane sira iha eleisaun suku tanba lei fo dalan, no durante ne’e feto barak mak hetan ona kapasitasaun iha area oi-oin hodi prepara an atu sai lideransa ida nebe di’ak.
Entertantu enkontru regular ba membru konsellu suku, grupu feto potensial, ema ho difisiensia, ema ho identidade jeneru no katuas lian na’in ne’e Centru Comunidade Covalima realiza tanba hetan apoiu Ajensia Internasional Dezenvolvimentu Feto husi Australia ne’ebe suporta programa feto ida ne’e hahu 2009, no enkontru regular ne’e hala’o iha salaun enkontru Centru Comunidade Covalima.
Jornalista : JS
Editor : CN
