Covalima (RCCT) 25-03-25-Centro Comunidade Covalima (CCC) desimina informasaun ba komunidade no joven sira iha Suku Kamanasa konaba prevene no redus konflitu entre Arte Marsiais, Asedu Sexsual no Disputa Rai iha Covalima.
Manejer Programa ba Dezenvolvimentu Feto Rural, Hilaria Amaral do Carmo, dehan, molok desimina informasaun, CCC hala’o ona aprosimasaun direita ho Xefe Suku hodi identifika isu preoridade ne’ebé akontese ne’ebé komunidade sira infrenta iha Kamenasa ligadu ho disputa bazila rai, asedu sexsual no Arte Marsiais.
“Antes ami realiza aktividades iha suku kamanasa, hala’o aprosimasaun direita ho xefe suku kamenasa hodi identifika isu preoridade sa mak akontese iha Suku Kamenasa ne’e rasik, depois ida ne’e ami ekipa hamutuk hodi halo konfirmasaun hodi realiza ,tanba ligadu iha ne’e isu oin tolu ne’ebé maka mensiona liliu konaba rai baliza, ida tan asedu sexsual, ida tan mos ita hare katak Arte Marsiais nian, ho ida ne’e maka ami hakarak konvida mos sira husi parte hotu atu fahe informasaun ba komunidade sira atu hasa’e sira nia kuñesimentu, bele minimiza konflitu kada violensia ne’ebé akontese iha ita nia komunidade sira rasik” Hilaria esplika.
Xefe suku kamanasa Fernando Noronha husu ba komunidade no joventude sira atu kria estabilidade iha suku laran, tanba emo hotu mai ho lisan ida deit.
“Tanba ho hanoin buat ne’ebé di’ak maka ita hotu halibur malu mai iha ne’e atu fahe informasaun sira ne’e ba ita hotu, durante ne’e kuaze iha problema oioin mosu iha suku no kada aldeia ho buat hirak ne’e hotu ita simu buat hira ne’e hotu halo oinsa ita atu hamenus problema ne’ebe mak ita hasoru no liliu ba joventude sira,” Xefe Suku Kamenasa, Fernando Noronha dehan.
Desiminasaun informasaun hanesan parte iha husi ekontru regular Centro Comunidade Covalima nian ho grupu alvu sira. Engkuantu atividade ne’e hala’o iha Sede Suku Kamenasa, ne’ebé partisipa husi komunidade no joventude sira husi aldeia hat iha kamenasa hamutuk ema na’in atus ida.
Jornalista : Alfredo Barreto
Editor : Chamot Nahac
