Covalima (RCCT) 02-03-24-Informasaun ne’ebé espalla iha plataforma online konaba Governu liu Sekretariu Estadu Formasaun Profesional no Emprego (SEFOPE) taka programa re-entry ne’e informasaun lalos.

Diretór Jeral Formasaun Profesional no Emprego iha SEFOPE, Carlito Rosario Cabral, reseita informasaun lalos tanba ida ne’e vale deit ba sira ne’e iha problema ho saude, idade no mos komportamentu servisu ne’ebe ladi’ak, maibe SEFOPE sei kontinua fo motivasaun ba trabalador sira ne’e emtermus de prepara sira nia kondisaun finanseiru ne’ebe sira hetak hodi halo negosiu ruma ba sira nia an.

“Sim tuir informasaun ne’ebé fo sai iha Jornal Independente foin lalais katak SEFOPE taka programa re-entry hanoin ne’e laloos maibe ita so deit fo motivasaun ba traballador sira ne’ebé ba mai servisu iha Australia katak to’o iha tempu ruma ne’e bazeia ba ita nia idade no mos karik iha problema saude ruma sira labele ba ona, tenke prepara sira nia an entermus de prepara sira nia nia finanseiru ne’ebé durante sira hetan karik sira la ba ona atu halo netik atividade negosiu ruma iha sira nia moris durante sira servisu, ne’ebé intensaun laos atu hapara programa re-entry maibe fo inisiativa ba sira katak programa ne’e dala ruma ho ita nia saude no problema ita nia idade dala ruma halo ema la simu ita klaru ema sei la simu no ita la ba tan servisu, tan ne’e husu atu poupa sira nia osan ne’ebé sira hetan durante ba mai para atu halo atividade negosiu ruma bainhira kuandu sira la ba ona” informa Diretor Jeral Formasaun Profesional no Emprego iha SEFOPE, Carlito Rosario Cabral ba jornalista hafoin realiza teste lian ingles ba kandidatu hamutuk na’in-3.184 ne’ebé hala’o iha Eskola Secundaria Geral Publiku Suai.

Diretór Carlito Rosario Cabral realsa, SEFOPE la’os hapara programa re-entry, maibe karik iha trabalador sira balu hatudu komportamentu di’ak maka empregador bolu fali sira bele fila ba servisu tanba iha oportunidade.

“SEFOPE husu no apela la’os ita atu hapara programa ida re-entry ne’e, re-entry ne’e tanba ita nia trabalador sira ho ninia kompotamentu di’ak ne’e ita tenke apresia, ne’e emprezariu sira maka bolu, ne’ebé ita apresia nafatin fo oportunidade ba sira sei hetan fiar nafatin husi ninia empregador ne’e ita laiha buat ida atu impede ema nia direitu, mais ita nafatin motiva ba sira katak to’o tempu ruma ita nia idade ho saude afeta ita sei para, tan ne’e ita husu durante sira servisu sira nia osan ne’ebé iha ho esperensia ne’ebé iha karik sira para duni ita iha ona modal finanseiru ba ita hodi halo fali atividade negosiu atu nune’e labele sai nafatin dezempregu, maibe na’in rasik hahu ho atividade negosiu ruma, ita bele sai fali empregador hodi fo fali servisu ba maluk timor oan sira ne’ebé sei dauk hetan servisu iha rai laran, ida ne’e mak intensaun husi SEFOPE katak la taka dalan no sei la impede programa re-entry ne’ebé hetan fiar husi trabalador ho empregador sira ne’ebé fiar ita, fiar ita nia trabalador sira tanba sira hatudu komportamentu di’ak” nia esplika.

Entertantu Diretór Jeral Formasaun Profesional no Emprego iha SEFOPE, Carlito Rosario Cabral, klarifika katak governu liu husi SEFOPE sei la hapara programa re-entry maibe parte SEFOPE hakarak apela deit ba iha trabalador sira atu kuidadu saude no osan ne’ebé durante ne’e sira hetan tenke rai didi’ak bainhira empregador sira hapara servisu maka bele utiliza osan ne’e hodi hala’o atividade negosiu.

Jornalista : Julio Salinas/Anis Mauk

Editor       : Chamot Nahac