Covalima (RCCT), 30 Setembru 2026 — Total benefisiáriu na’in-6.953, kompostu husi ema idade ferik-katuas no ema ho defisiénsia, sei simu pensaun sosiál husi Ministériu Solidariedade Sosiál no Inkluzaun (MSSI), liuhusi Banku Nasionál Komersiál Timor-Leste (BNCTL), iha pagamentu fase datoluk.
Koordenadór Institutu Nasional Seguransa Sosiál (INSS) Munisípiu Covalima, Bernardino Sequeira, hateten katak benefisiáriu sira ne’e mai husi postu administrativu hitu iha Munisípiu Covalima.
“Bazeia ba dadus benefisiáriu pensaun sosiál ba ema idade ferik-katuas no ema ho defisiénsia husi postu administrativu hitu, total benefisiáriu ba pagamentu fase datoluk hamutuk na’in-6.953, ho orsamentu hamutuk US$1.578.230,” Bernardino hateten iha Suai, Covalima.
Nia hateten katak prosesu pagamentu pensaun sosiál ba fase datoluk sei hahú iha 12 Outubru no remata iha 16 Outubru 2026. Pagamentu sei hala’o tuir oráriu ne’ebé MSSI simu husi BNCTL no sei distribui ba postu administrativu sira.
Pensaun sosiál ba ema idade ferik-katuas fahe tuir grupu idade. Ema ho idade 60 to’o 69 tinan sei simu US$60 kada fulan, ka US$180 ba fulan tolu. Ema ho idade 70 to’o 79 tinan sei simu US$80 kada fulan, ka US$240 ba fulan tolu. Enkuantu ema ho idade 80 tinan ba leten sei simu US$100 kada fulan, ka US$300 ba fulan tolu.
Iha fase daruak, total benefisiáriu pensaun sosiál hamutuk na’in-6.870, kompostu husi ema idade ferik-katuas na’in-6.513 no ema ho defisiénsia na’in-357.
Enkuantu iha fase dahuluk, total benefisiáriu hamutuk na’in-7.218, kompostu husi ema idade ferik-katuas na’in-6.843 no ema ho defisiénsia na’in-375.
Dadus ne’e hatudu katak númeru benefisiáriu iha fase datoluk aumenta kompara ho fase daruak, maibé tun kompara ho fase dahuluk.
Jornalista: Paul Mandeu
