Covalima (RCCT) 09-02-24-Timor-Leste ukun rasik an tinan 20 resin ona maibe komunidade iha Aldeia Pelet no Somo K’nua, Suku Lour, Postu Administrativu Zumalai, Munisipiu Covalima, sei kuitadu, kontinua hela iha nakukun laran tanba seidauk asesu ba liña eletrisidade maske governu ukun troka malu to’o dala sia ona.
Husi kedas tinan 2019, 2022 to’o 2023, reprezenta reprezente komunidade uma kain 156 ho total populasaun hamotuk ema na’in 660, Xefe Aldeia Pelet Carlito Tilman Barros, husu ona ba governu liliu ba iha ministeriu relavante sira atu dada liña eletresidade iha Aldeia Pelet maibe to’o agora seidauk iha rezultadu.
“Ha’u ukun nudar xefe aldeia iha Pelet tama ona ba tinan 14 mais susar la halimar, primeiru maka konaba eletrisidade, ha’u hatama tiha ona proposta ba iha ministeriu relevante konaba eletrisidade, ba iha postu, munisipiu no nivel nasional, ha’u nia proposta tama hahu kedas iha tinan 2019, 2022 to’o 2023 ona realidade to’o 2024 seidauk rona informasaun agora ne’e mos ha’u tenta nafatin konaba eletrisidade” dehan xefe Aldeia Pelet.
Aleide ne’e, Xefe Aldeia Somo K’nua, Flavio Branco Leto Mau, husu ba Governu atu dada liña eletrisidade ba to’o ba iha Somo K’nua tanba durante ne’e komuniade sira sei hela iha nakukun wainhira kalan.
“Nudar autoridade lokal iha Aldeia Somo Knua durante Timor ukun an tama ona ba tinan 20 resin ona ami nia aldeia ne’e la asesu ba eletrisidade ho ida ne’e aproveita tempu hakark hato’o ba ministeriu relevante atu tau matan ba ami nia aldeia ne’e ahi sei dauk tama hodi la fo naroman ba komunidade sira iha tempu kalan” dehan Xefe Aldeia Somo Knua Flavio Branco Leto Mau.
Xefe Suku Lour Martinho Julio Barret Alves, rekuñese Aldeia Pelet no Somo k’nua seidauk asesu ba eletrisidade, maibe nia dehan ekipa tekniku husi Eletrisidade Timor Leste, Empreza Publiku (EDTL,Ep) husi nasional halo ona survey atu dada liña eletrisidade.
“Loos duni aldeia rua maka seidauk asesu ba eletrisidade, hanesan aldeia Pelet no Somo Knua, ne’ebe ita hato’o ona beibeik ba iha parte relavante sira hatama ona pedidu iha ne’eba maibe to’o agora seidauk hetan resposta, tuir informasaun ne’ebé maka ita rona katak 2024 ne’e atu realiza, tanba ekipa husi EDTL nasional mai halo ona survey maibe ate agora sira seidauk mai fali” nia dehan.
Entertantu Xefe Aldeia Somo Knua, Flavio Branco Leto Mau no Xefe Aldeia Pelet Carlito Tilman Barros, antisiamu husu ba governu da sia ne’e lidera husi Primeiru Ministru Kay Rala Xanana Gusmão atu tau atensaun ba problema ne’ebé povu sira iha area rurais hasoru, liu liu komunidade Aldeia Pelet Somo K’nua, Suku Lour Postu Administrativu Zumalai Infrenta konaba la Asesu ba liña eletrisidade.
Jornalista : Julio Salinas
Editor : Chamot Nahac
