Nune’e Reprezenta Administrador Postu Administrativu Tilomar, Venancio dos Santos, husu ONG HLT kontinua habelar programa refere to’o iha suku sira seluk ne’ebe lokaliza iha PostuAdministrativu Tilomar.

“Hanesan reprezenta autoridade lokal ida hakarak rekomenda ba iha ONG lokal no internasional sira maka ejiste iha Covalima liliu ba iha ONG HLT ne’ebé maka suporta ona komunidade iha Aldeia Fau Laran, Suku Maudemo, nudar lideransa komunitaria nafatin sujere ba ONG HLT atu bele loke ka haluan tan programa ne’e, labele para de’it iha parte rai tetuk, maibe nafatin bele ba mos iha parte foho hanesan Suku Lalawa, no Suku Beiseuk maizumenus sira labele haki’ak modo ka kuda pateka karik sira bele haki’ak animal hanesan karau, fahi ka manu” Venancio dos Santos, hato’o lia hirak ne’e hafoin partisipa iha serimonia lansamentu kolleta pateka no entrega makina mini tiller rua ba grupu agrikultor Fini Uman no Grupu Hadi’a Moris iha Aldeia Fau Laran, Suku Maudemo, Postu Administrativu Tilomar.

Diretór Ezekutivu ONG HLT, Cipriano Menezes, dehan sei halo uluk idebtifikasaun ida ne’ebé k’lean iha komunidade hodi hatene grupu hira mak komunidade sira forma ona, molok HTL habelar programa to’o iha suku no aldeia ne’ebé seidauk kobre.

“Ha’u hanoin iha parte foho husi parte HLT primeiru sei sei survey uluk husi parte foho ne’e nia iha rasik grupu ka lae, prepara ona ka lae, ita ba dehan apoiu hanesan akontese iha tinan 20 ba kotuk husi governu fo direitamente no fin osan ne’e sai lakon hotu maibe ita atu fo ne’e orsamentu aloka husi gabinete primeiru ministru mai organizasaun sosiedade sivil iha kada munisipiu jere ne’e ba sosa tiha fali material tuir organizasaun nia konseptu ne’ebé apoiu ba grupu ne’e nia hakarak ka lae, HLT keixa maka ne’e primeiru survey, segundu ita haree grupu ne’e di’ak ona ONG mai apoiu tan de’it, apoiu ida ne’e hanesan sasukat para oinsa atu motiva sira bele hadi’a sira nia moris iha nivel uma kain,” nia informa.

Nune’e mos Reprezentan Xefe Suku Maudemu, Anacleto Deneri Ferreira Vicente husu ba HLT atu apoiu mos ekipamentu hanesan ba grupu agrikultor sira seluk iha suku ka aldeia sira, labele fo apoiu de’it grupu sira hela iha rai tetuk, nia mos relata hanesan membru konsellu suku nafatin apoiu ONG HLT hodi halo kontrola ba atividade hotu hala’o iha suku Maudemu.

Jornalista : Julio Salinas

Editor      : Chamot Nahac