Covalima (RCCT)21-02-24-Komunidade no autoridade iha Postu administrativu Fohorem konsidera Planu Nasional dezenvolvimentu Suku (PNDS) Covalima menus halo kontrolu ba Projetu sira ne’ebe iha Suku tanba projetu Be mos no Uma Naroman ba Povu (UNP) ne’ebé realiza ba planu 2021 maibe to’o agora seidauk finaliza no balun abandonadu.
Xefe Aldeia Sadahur, Suku Fohorem, Elisabet Soares dehan fallansu ne’e mosu tanba menus funsionariu PNDS sira ne’ebé destaka iha Postu Fohorem hela iha Suai, nune’e susar atu halo kontrolu no hala’o k’nar ho di’ak.
“Implementasaun PNDS Iha 2021 seidauk iha nia rezultado tanba baihira Funsionariu iha postu la iha no mos funsionariu Sira hela dok husi postu tanba ne’e sira labele mai halo kontrolu, iha inplementasaun servisu no mos tekniku sira la realiza sira nia k’nar tanba baihira komunidade servisu hela sira la iha atendementu, Be Mos iha suku fohorem Fasilita ona husi PNDS no BTL, EP, no SAS maibe realidade iha tempu naruk nia laran seidauk iha nia rezultadu atu bele responde ba komunidade sira nia prekupasaun”Elisabet Lamenta.
Xefe Aldeia Lorokida, Melkiano do Rego mos relata funsionariu PNDS deskadu la iha Postu Administrativu Fohorem maka sira sei la hala’o k’nar ho di’ak atu halo kontrolamentu ba projetetu ne’ebé implementa iha baze.
“Funsionario PNDS sira ne atu halo sa ida sira iha uma deit fulan to sira ba simu sira nia osan maibe sira nia k’nar ne’e sira la hala’o tun ba iha baze” Katak nia.
Veterano Fernando Ferreira, hanesan mos Eis Xefe Suku Fohorem Vila dehan mosu fallansu ba implementasaun Projetu PNDS iha Fohorem la’os sala iha Fornesedor sira maibe ne’e menus kontroru husi PNDS rasik tanba Funsionariu hela dok.
“PNDS rasik la esforsu an atu finaliza obra ida ne’e, ba fornesedor, ha’u hanoin sira la iha problema tanba material sira ne’e waihira planu husi tekniku mak foin bele intrega ba sira sira foin bele hatama karik laiha maka sira labele hatama, funsionariu PNDS sira la hela iha postu fohorem maibe sira hela iha munisipiu entaun sira sai husi munisipiu oras tuku 8 ou tuku 9 molok to iha ne’e lokraik ona entaun halo nusa mak sira bele kontrola programa PNDS ne’ebé mak implementa iha suku hat, entaun ida ne’e mak halo impaktu to’e agora no teknik mos na’in rua deit sira labele kontrola ba suku hat no sira kazuais hotu permanenti ida mos laiha” Katak Fernando Ferreira.
Entretantu Projeitu PDNS ne’ebe implementa iha Postu Administrativu fohorem maka projeitu be mos no Uma Naroman ba Povu ne’ebe hahu kedas iha tinan 2021 maibe to’o seidauk finaliza.
Jornalista : Moichung/Julio Salinas
Editor : Chamot Nahac
