Covalima(RCCT)18-01-24-Autoridade sira iha Munisipiu Covalima kompostu husi Sekretariu Munisipiu Covalima, Diretór Edukasaun Munisipiu Covalima inklui veteranu Covalima hala’o enkontru ho inan aman estudante sira hodi buka solusaun ba estudante 200 resin ne’ebé akaba ona eskola iha ensinu baziku maibe seidauk tuir prosesu aprendisajem iha Eskola Sekundaria.
Sekretariu Munisipiu Covalima Francisco de Jesus Alves, ba jornalista sira iha nia knar fatin dehan enkontru ho inan no aman sira ne’e ho objetivu atu buka dalan ba estudante na’in 200 resin ne’ebé rejista ona maibe la konsege tama iha Eskola Sekundaria Jeral Publiku (ESGP) Suai.
“Enkontru ida ohin ne’e ho ita nia inan aman sira husi estudante na’in 200 resin ne’ebé maka rejistu ona maibe la konsege tama iha eskola sekundaria geral publiku Suai, tanba bazeia ba despaixu husi Ministra Edukasaun nian ne’ebé fo sai katak iha limitasaun ba estudante sira atu tama iha ESGP Suai ne’ebé ho deit simu estudante foun 540 pesoas, maibe estudante sira ne’ebé maka ba rejistu iha ema na’in 700 resin, tanba ne’e mak estudante na’in 200 resin labele tama tanba bazeia ba despaixu, parte ida mos hare ba iha limitasaun aula ka sala eskola lapremite atu bele simu estudante sira hotu, parte seluk mos ita haree ba profesores kontratadu sira ne’ebé maka anterior sira nia kontratadu remata ona iha 31 Dezembru 2023, tan ne’e ita iha limitasaun ba iha forsa traballu ba iha profesores sira atu bele hanorin ita nia oan ho numeru boot liu tanba ne’e mak iha limitasaun” esplika Sekretariu Munisipiu Covalima Francisco de Jesus Alves.
Diretór Edukasaun Munisipiu Covalima Franselino Freitas Carvalho, haktuir enkontru ho inan no aman estudante sira ne’e inisia husi administrasaun munisipiu para atu buka solusaun ba estudante na’in 200 resin ne’ebé eskola hotu iha tinan ida ne’e.
“Administrasaun maka realiza ne’ebé ninia solusaun maka ita fo opsaun rua asesu ba eskola tekniku vokasional Akar Laran ba estudante na’in-200 resin ne’ebé tuir dadus ne’ebé edukasaun munisipiu Covalima iha, fo opsaun para sira bele ba rejistu iha tekniku vokasional no servisu edukasaun mos fo ona orientasaun para sira bele taka inskrisaun atu loke nafatin hodi simu estudante foun karik sira hakarak eskola tekniku vokasional Akar Laran, segundu maka administrasaun munisipiu sei manda karta ida ba ministeriu, nafatin iha mudansa uitoan deit maibe iha ESGP pozisaun nafatin ba tinan ida ne’e simu estudante foun na’in-540 tuir despaixu ministeriu hatun, ba Fohorem 50 resin estudante no Zumalai foin 150 resin estudante maibe Akar Laran maka iha mudansa uitoan husi simu estudante foun na’in-14 sae 28 pesoas” nia dehan.
Hafoin Partisipa iha enkontru ne’e reprezentante Veteranu Munisipiu Covalima Joaquim Barros relata rezulta husi enkotru ne’e mak foti konkluzaun atu halo karta ba ministeriu edukasaun no mos alternativa seluk mak husu ba inan no aman sira atu haruka sira nia oan ba rejistru iha eskola teknika vokasional akar laran.
“ami foti konkluzaun rua maka ida estrutura munisipiu halo karta pedidu ida ba Ministra Edukasaun atu bele hare futuru estudante na’in 200 resin ne’e no ida seluk fo ba inan aman atu bele lori oan sira ba rejistu iha eskola Akar Laran” nia realsa.
Maibe Reprezentante Inan aman Michael Amuf Neno, dehan enkontru seidauk iha solusaun ba sir ania oan nia futuru tanba administrasaun munisipiu sei labele kompetensia atu ba karta sirkular ne’ebé ministeriu edukasuan hasai ona ne’e, Mikael mos mantein katak sei la haruka sira nia oan ba eskola iha eskola teknika Vokasional Akar Laran.
“Ami ohin ohin enkontru ho adjuntu munisipal Covalima, ho nai veteran Munisipiu Covalima nian inklui Diretor Edukasaun Munisipiu Covalima katak nia solusaun ohin seidauk hetan tanba sira mos labele foti desizaun ba sirkular ne’ebé ministeriu fo sai, tanba husi inan aman hakarak oan sira atu eskola iha ESGP suai, ami hare eskola Akar Laran nia afetasaun barak tanba eskola di’ak maibe nia iha tempu udan ami nia oan sira movimentu ba mai ladun di’ak, se inundasaun akontese se maka responsabilidade, ida ne’e mak ami husu ba mnisteriu” nia dehan.
Entertantu tuir dadus ne’ebe iha konaba estudante ne’ebe rejista ona iha Servisu Edukasaun Covalima atu tama eskola iha eskola sekundaria publiku jeral hamotuk ema na’in 204.
Jornalista : Julio Salina
Editor : Chamot Nahac
