Covalima (RCCT) 27-05-26-Tersa ne’e Autoridade Munisipiu Covalima liu husi Servisu Munisipal Apoiu Organizasaun Naun Governamentais no Organizasaun Komunitaria realiza enkontru konsolidasaun servisu ho Xefe Seksaun Komunitariu Administrasaun Postu Administrativu 7 no Lideransa Komunitariu (LK) kompostu husi Xefe Suku na’in 30 hodi avalia konaba formatu servisu ne’ebé prega ba pesoal apoiu suku na’in hat ne’e koloka ona iha suku ida idak.
Diretóra Servisu Munisipal Apoiu Organizasaun Naun Governamentais no Organizasaun Komunitaria, Maria de Jesus Pereira, hatete, liu husi enkontru ne’e atu hametin liña koordenasaun entre entidade sira hodi bele hala’o servisu tuir formatu servisu ne’ebé iha ona.
“Atu haree fila fali formatu ne’ebé maka durante tinan kotuk ita fo tiha ona liu husi eletronik no manual, ne’ebé fo ba iha suku bo postu, ho nune’e oinsa ita bele halo servisu ne’ebé di’ak liu tan, maibe realidade ne’ebé ami hasoru katak durante ne’e la’o tarde liu, tanba Quarter primeiru (QI) deit seidauk kompletu, Orientasaun husi ita nia Prezidente Autoridade katak dadus ne’e tenke lalais, tanba durante ne’e formatu ami fo kedas, karik liu rai sira foti dadus husi xefe aldeia sira mai suku, ita bo’ot sira tenke priense ba formatu ami fo ona, maibe mai la tuir formatu ne’ebé maka iha,” informa Diretóra Servisu Munisipal Apoiu Organizasaun Naun Governamentais no Organizasaun Komunitaria, Maria de Jesus Pereira, iha nia intervensaun.
Prezidente Autoridade Munisipiu (PAM) Covalima Miguel Armada Cardoso “Razão” dehan ofiaisial suku na’in-3 no Sekretaria Suku ne’ebé governu rekruta ona tenke servisu maka’as hodi elabora dadus suku ida ne’ebé adekuadu.
“Atu ko’alia konaba desiminasaun informasaun no buat sira seluk ne’e hanoin sira na’in-4 ne’e importante liu, ida xefe suku ne’e lider komunitaria, ita komprende saida maka lider komunitaria, sira foti desizaun, halo planu servisu hamutuk ho funsionariu na’in-4 ne’e.” dehan PAM Covalima Miguel Armada Cardoso “Razão”.
Enkuantu atividade enkontru konsolidasaun ne’ebé organiza husi Servisu Munisipal Apoiu Organizasaun Naun Governamentais no Organizasaun Komunitari ho Lideransa Komunitaria (LK) sira ne’e hala’o iha Salaun enkontru Administrasaun Munisipiu Covalima no hetan partisipasaun husi Prezidente Autoridade Munisipiu (PAM) Covalima Miguel Armada Cardoso “Razão.
Jornalista : Julio Salinas
Editor : Chamot Nahac
