Covalima (RCCT) 22-04-25-Xefe Suku Beko Arlindo Bernadinho Lemos, husu diskulpa ba publiku relasiona ho atetudi ne’ebe ema deskoñesidu kesi tali iha auto estrada partensia ba iha area Suku Beko.
Lideransa Komunitaria ne’e dehan seidauk hatene serteja konaba sese mak kesi tali hodi dada korta iha auto estrada area Suku Beko. Maibe hanesan lideransa komunitaria sei esforsu kopera autoridade siguransa liliu ofisial polisia suku (OPS) hodi buka tuir autor refere.
“Ha’u hakarak hato’o diskulpa konaba hahalok ida ne’ebé halo iha Auto Estrada no viral iha media sosial la sala iha kinta feira loron 17 fulan Abril, momentu ne’eba akontese iha auto estrada alin feto ida halo viajen husi kapital Munisipiu ba Zumalai liu husi auto estrada to’o iha dalan k’laran partensia ba iha Aldeia Aidantuik ho Beko sentru ninian hetan tali ema deskoñesidu kesi husi estrada sorin ba estrada sorin, loos duni depos de akontese ami mos hetan informasaun husi parte relevante sira ami to’o kedas fatin akontesimentu, ita identifika katak area ida ne’ebé akontese situasaun ne’e iha Aidantuik ho parte Beko sentru nia leet, maibe hakarak hatete ba hotu-hotu katak ema ida ne’ebé halo atetudi ida ne’e iha auto estrada ita la hatene, tanba ne’e hatete ba hotu-hotu katak ami hamutuk ho OPS sei, sei’i tilun, soe matan hodi hare se maka halo buat ne’e maibe ita la hatene atu kaer se ida” deklara Xefe Suku Beko ba RCCT iha nia K’nar fatin Sede Suku Beko, Tersa (22/04).
Xefe Suku ne’e kompromete wainhira deteta konaba komunidade Beko mak dada tali korta iha auto estrada mak sei entrega ba autoriade siguransa hodi halo prosesa tuir lei
“Karik Komunidade balu maka halo duni atetudi ida ne’e, ita deskobre ema ruma liliu Komunidade Suku Beko maka halo ida ne’e Ita lalika ko’alia barak, maibe ita lori ba liu iha prosesu, seguransa mai foti nia lori ba prosesu, tanba ne’e planu oho ema, kuandu ita deskobre ema ruma iha suku laran halo aktu ida ne’e maka ita sei la tolera nia, maibe ba agora dadaun ita sei hatene se maka halo atetudi ida ne’e” dehan Xefe Suku Beko.
Entretantu iha Loron 17 Fulan Abril Foin dadaun, Feto ida sai vitima ba Ema deskuñesidu ne’ebé dada tali korta dalan iha Auto Estrada Area Suku Beko, Postu Administrativu Suai, Munisipiu Covalima.
Jornalista : Julio Salinas
Editor : Chamot Nahac
