KOMUNIKADU IMPRENSA
Apresiasaun ba Servisu Forsa Tarefa (PNTL no F-FDTL) Durante Vizita
Papa Francisco nia iha Dili, Timor-Leste
Data: 16 Setembru 2024
Liu hosi komunikadu imprensa ida ne’e ONG HABADA hato’o ninia apresiasaun no rekoñesimentu ne’ebe kle’an ba servisu ezemplár ne’ebe hala’o husi Forsa Tarefa kompostu hosi Polícia Nacional Timor-Leste (PNTL) no FALINTIL-Força de Defesa de Timor-Leste (F-FDTL) durante vizita istóriku husi Sua Santidade Papa Francisco iha Dili, Timor-Leste, hosi loron 9 to’o 11 fulan Setembru tinan 2024.
Eventu ne’ebe atrai fiél no vizitante rihun ba nasaun ne’e, hala’o ho orden no seguransa ne’ebe bo’ot tebes, hodi reflete dedikasaun, profisionalizmu no koordenasaun impekável forsa seguransa nian. Planeamentu estratéjiku no esforsu hamutuk entre PNTL no F-FDTL garante katak vizita ne’e hala’o lahó insidente, hodi permite populasaun selebra momentu importante ne’e ho neon hakmatek.
Ami rekoñese dezafiu lojístiku no operasionál atu jere ema-lubun ida ho magnitude hanesan ne’e, nune’e mós nesesidade atu proteje la’ós de’it Papa Francisco, maibé mós sidadaun no peregrinu rihun ba rihun ne’ebe partisipa iha eventu sira. Prezensa vijilante no respeitu hosi forsa seguransa sira kontribui ba susesu eventu ne’e no manutensaun ba pás no orden públika.
ONG HABADA hato’o hikas ninia agradesimentu ba Governu Timor-Leste, PNTL, F-FDTL, no ema hotu ne’ebe envolve iha preparasaun no ezekusaun medida seguransa nian. Esforsu konjuntu ne’e hanesan ezemplu klaru kona-ba oinsá kooperasaun bele garante susesu ba eventu sira ho eskala bo’ot, hodi reforsa konfiansa populasaun nian ba instituisaun nasionál sira.
Papa Francisco nia vizita la’ós de’it hametin lasu espirituál no kulturál sira iha Timor-Leste, maibé mós hatudu nasaun ne’e nia kapasidade atu sai uma-na’in ba eventu internasionál sira ho efisiente no seguru.
Informasaun kle’an liu tan halo favor kontaktu:
Abel Amaral
Diretor Ezekutivu
Mobile: +670 7745 4324
Email: abelamaral75@gmail.com
Website: www.habada.org
