Covalima (RCCT) 13-08-24-Maske iha tinan barak nia laran korpo Bombeiru Covalima halerik ba rekursu no ekipmanetu, maibe oras ne’e daudaun governu liu husi Autoridade Protesaun Sivil (APC-sigla portugues) tau ona planu atu halo rekrutamentu ba Membru foun no atu reposde ba ekipamentu hirak ne’ebé menus.

Prezidente Autoridade Protesaun Sivil (APC-sigla portugues) Jesuino dos Reis de Matos Carvalho, relata ba jornalista sira dehan sei moderniza ekipamentu husi sasan tuan ne’ebé durante ne’e funsionariu bombeiru sira uza hodi hala’o servisu iha terenu ne’e ninia kondisaun ladun di’ak ona, no mos sei halo rekrutamentu foun hodi aumenta forsa tarefas iha terenu.

“Loos duni sei falta rekursu no ba ekipamentu apoiu sira nia servisu no agora daudaun fatin ne’ebé sira uza hodi hala’o servisu ba ne’e mos kondisaun ladun di’ak ona, ami hakarak mos halo formasaun ba sira para kontinua sira ne’e bele preparadu, ami aranja formasaun di’ak ida ba sira, para sira bele preparadu kualker tempu, no planu sei moderniza ami nia ekipamentu ne’ebé uza tinan barak ona dala ruma bele iha failansu kuandu sira uza beibeik no laiha manutensaun di’ak, ne’ebé realidade hatudu buat sira ne’e uza tinan barak ona ne’ebé presija troka no presija halo preparasaun, ha’u espera katak ita nia nai ulun sira bele responde daudaun ona ami nia proposta iha fulan 2 ka tolu mai ne’e ami bele loke ona rekrutamentu ida ne’e para aumenta tan ita nia forsa tarefas iha baze, ida ne’e maka ami sei hare ho nesesidade tanba balu nia sufsiente balu ladun ne’ebé ami hare no ami sei aumenta tan rekursu iha postu” dehan Prezidente Autoridade Protesaun Sivil (APC-sigla portugues) Jesuino dos Reis de Matos Carvalho.   

Komandante Korpu Bombeiru Covalima, Noti de Jesus Alves, apresia ho planu rekrutamentu ba membru foun nune’e hodi bele atinji mentas servisu bombeiru iha atendementu tomak liu liu ba komunidade sira ne’ebé harosu dezastre.

“Ha’u hanoin ho prezensa Prezidente Autoridade Protesaun Sivil (APC-sigla portugues) Jesuino dos Reis de Matos Carvalho ho nia ekipa iha Covalima hanoin sira mos iha planu atu fo formasaun, no atu estabelese tan postu ida iha Postu Administrativu Fohorem, atu aumenta tan pesoal balu iha ne’eba atu nune’e bele atinje Bombeiru nia metas ne’ebé durante ne’e nia servisu iha baze liliu ba iha situasaun emerjensia” informa Komandante Bombeiros Covalima Noti de Jesus Alves.

Entretantu Prezidente Autoridade Protesaun Sivil, Jesuino dos Reis de Matos Carvalho, dehan iha planu no tempu badak sei halo rekrutamentu ba membru bombeiru, no ba futuru sei moderniza ekipamentu antiga ne’ebé utiliza durante ne’e hodi halo atendimentu.

Joprnalista : Julio Salinas

Editor        : Chamot Nahac