Covalima (RCCT) 24-02-25-Autoridade Protesaun Sivil (APC-sigla Portuguesa) Komisaun Jestaun Dezastre Munisipiu (KDJM) iha Covalima fo apoiu emerjensia no food item no food item ba vitima insendiu, Angelo Ferreira ho familia iha Aldeia Sadahur ne’ebé akontese iha loron sabadu (22/02) hale’u tuku rua madrugada iha suku Maudemo Postu Administrative Tilomar Munisipiu Covalima.
Ko’alia ba Jornalista sira, Komandante Autoridade Protesaun Civil Covalima Celestino Afonso Ferreira hatete apoiu ne’ebé fo ba familia vitima ne’e atu hodi aguanta moris iha tempu badak liu liu konaba hela fatin no mos aihan ba familia sira.
“tipu apoiu ne’e ita fo non food item no food item, non food item ne’e mak hanesan lona, sanan, bikan, tasu ho buat sira seluk ne’ebé mak iha ona ne’e no food item hanesan fos, supermi, mina no dose, ita ajuda netik para sira bele tutan sira nia moris iha tempu badak nia laran, oinsa familia sira balu bele apoiu sira mai para sira halo hamutuk sira nia Baraka oan ruma para sira atu hela” hatete Komandante Autoridade Protesaun Sivil, Covalima Celestino Afoso Ferreira.
Afonso fundamenta katak hafoin liu tia insendiu ekipa hala levatamentu dadus ba vitima Angelo Ferreira ho familia ne’ebé deskobre la tama kriteria atu hetan tulun material konstrusaun uma nian, tan insidente ahi han ne’e iha uma to’os.
“Ita foti dadus ba vitima la tama iha kriteria tanba eransa ida ne’ebé mak sira hela ba ne’e rai estadu no mos uma ne’ebé sira hela ba ne’e mos hanesan iha to’os laran, entaun ida ne’e evidensia ida ne’ebé ladun forte ita atu manda ba nasional ne’eba hodi prosesa ba oin,” tenik nia.
Entretantu iha insidente insendiu ne’e vitima Angelo ho familia lakon sasan uma laran, hanesan motorizada ida ho marka honda supra fit ida, telephone hamotuk rua, Batar Bidon tolu, animal hanesan manu inan hitu ne’ebé ahi sunu motuk iha luhan laran, inklui Osan hamotuk dolar amerikanu atus tolu lima nulu ($ 3, 50.00) inklui sasan sira seluk.
Jornalista : Alfredo Barreto
Editor : Chamot Nahac
