Covalima (RCCT) 09-02-24-Simu tiha pose nudar Administrador Postu Administrativu (APA) Zumalai, iha loron 6 fulan Febreiru 2024, Alipio Magno, sexta ne’e relata ba Jornalista sira iha katak, nia parte halo ona identifikasaun ba problema infraestrutura sira ne’ebé durante ne’e komunidade infrenta.
Administrador Postu Administrativu Zumalai, Alipio Magno dehan Problema Infrastrutura ne’ebé Komunidade sira infrenta maka konaba Eletrisidade, be mos no estrada.
“Hafoin iha loron Tersa (06/02) ha’u hetan pose, hau identifika ona problema infraestrutura sira ne’ebé ha’u nia komunidade sira iha Postu Zumalai infrenta, liliu ba estrada, bee moos no eletrisidade, komesa uluk husi Suku Lour ba to’o iha Aldeia Salasa ho Tilis no bairo ida naran Taegel uluk seidauk iha maibe foin lalais iha oitavu governu, eletrisidade tama to’o iha ne’eba, problema ba sira maka estrada mak seidauk iha eletrisidade sira asesu ona,” APA Zumalai Alipio Magno esplika.
Nia Salienta, konaba komunidade sira iha suku Lour mos seidauk asesu ba liña eletrisidade no kondisaun estrada seidauk di’ak.
“iha aldeia Pelet Suku Lour ninian husi Bulu ba Aldeia Pelet ne’e eletrisidade mos seidauk, estrada husi Pelet ba suku seluk mos seidauk di’ak, ba aldeia Somo Knua komunidade sira maioria hela iha estrada ninin maibe ninia bairo ida naran Hedan ne’e distansia husi suku Lour ne’e nia tama kuaze kilo metro 5 hanesan ne’e tan ne’e seidauk asesu ba liña eletrisidade inklui estrada” Tenik nia.
Nune’e APA Zumalai Alipio Magno dehan iha nia mandatu sei halo planu fazeadamente hodi respodente ba nesesidade povu konaba asesu ba be mos, eletrisidade no estrafa, molok nia mandatu nudar Administrador Postu Administrativu Zumalai remata.
Jornalista : Julio Salinas
Editor : Chamot Nahac
