RAIMEA—-Administrador Postu Administrativu (APA) Zumalai Rui dos Santos, husu ba grupu agrikultores sira ne’ebe sai benefisariu direita ba projetu SAPIP iha Suku Raimea, Postu Administrativu Zumalai, atu kuidadu hand trator unidade-16 apoiu husi SAPIP.
“Iha oportunidade ida ne’e hau hakarak husu ba grupu agrikultor sira mos katak uluk ita dehan karau agora ita bolu mesin (makina) ona, uluk kuandu ita halai natar uza karau kuandu kolen no hamlaha ona tenke husik karau sira deskansa hodi han du’ut lai, agora makina mos hanesan kuandu uza nia hodi halai natar sente manas loos ona tenke para halo malirin tiha mak bele uza kontinua hodi fila rai natar atu nune’e nia labele at lalais” informa Administrador Postu Administrativu Zumalai Rui dos Santos, iha nia intervensaun hafoin partisipa serimonia SAPIP halo distribuisaun hand trator unidade-16 ba grupu agrikultores-16 iha Aldeia Beilaku, Suku Raimea, Kuarta (01/02).
Nia haktuir grupu agrikultor sira tenke halo tratmentu diak ba makina sira ne’e, para mikina ne’e bele diak no dura ba agrikultor sira hodi fila rai natar iha Suku Raimea laran.
Nia dehan makina hirak ne’e tenke kuidadu tanba sosa ho nia folin boot, labele hanoin dehan uza deit, maibe tenke trika olio bebeik, mina labele halo maran liu maka enxe ne’e ladiak se lae maka se8 uza makina sira ne’e la to’o tempu ne’ebe naruka tanba la kuidadu.
APA Zumalai lakohi rona lia fuan ida katak uza deit sasan sira ne’e atu at ka diak la intrese tanba ne’e governu nian, tanba ne’e lakohi iha Raimea atu akontese hanesan, maibe sasan sira ne’e MAP liu husi projetu SAPIP hasai orsamentu boot sosa no fo gratuita ba povu sein hasai vintes ida, tan ne’e tenke hatene kuidadu.
“Estadu hadomi nia povu maka fo trator gratuita mai ita maka tenke halo kalkula iha ita nia moris, ita labele ohin uza aban at ne’e sala boot liu tanba husu atu grupu sira kuidade hand trator para bele hela ho durasaun kleur no bele fo benefisiu ba grupu agrikultor sira, ida ne’e maka hau haklekar hela ba ita boot sira ne’ebe ohin simu trator ne’e” nia haktuir.
Xefe Grupu Hali Boot, Feliciano Cortereal, sente kontente tanba SAPIP bele apoiu ona hand trator ba grupu agrikultor sira hodi bele halai ona sira nia natar hodi sustenta ba moris lor-loron nian.
“Hau sente kontente tanba ohin loron SAPIP bele mai tulun ona ami kona-ba hand trator bele ajuda ona ami halai natar nune’e hasae produsaun hodi sustenta ami ba moris lor-loron nian” nia informa.
Nia haktuir ho SAPIP nia apoiu hand trator ne’e bele redus orsamentu ne’ebe durante ne’e benefisariu grupu agrikultor sira durante ne’e hasai hodi gastu ba fila rai natar.
“Orsamentu ne’ebe ami gastu durante ne’e hodi selu operador ida ne’ebe kaer trator hodi fila komunidade nia rai matar iha suku Raimea laran, tanba ne’e ho ona apoiu husi SAPIP bele redus ona orsamentu ne’ebe durante ne’e hodi selu trator” nia afirma.
Xefe Grupu Hali Boot ne’e husu ba membru grupu sira atu utiliza hand trator ne’e ho kuidadu atu nune’e bele uza to’o tempu naruk.(Azu)
