APA Tilomar Venancio Sarmento informa hafoin atividade ne’e realiza tanba hetan apoiu husi emprezariu lokal Tilomar oan sira ne’ebé kontrtibui tuir ida idak nia k’bit.
“Bainhira profesor sira tau hela pedidu ba iha postu ho ida ne’e maka ha’u orienta ba kompañia lokal sira ne’ebé ejiste iha Tilomar ne’e hodi kontribui material rai henek ho semente, durante ne’e kompañia sira kontribui ona tanba ne’e maka ohin loron profesor no alunu sira hadi’a sala sira ne’ebé at ka nakfera, no uma eskola ida ne’e rasik hari iha tempu Indonezia, ukun an mos nunka iha hadi’a ho ida ne’e maka ohin foin hadi’a ne’e atu nune’e iha ezame segundu trimestral mai ne’e alunu sira bele uza tur iha sala laran ho di’ak, karta ne’ebé ha’u husu ba kompañia atu fo kontribuisaun rai henek no semente ne’e iha kompañia 10 maibe foin iha kompañia balu maka fo uluk ona kontribuisaun maibe ba sira seluk sei hein ikus” dehan APA Tilomar Venancio Sarmento ba jornalista iha Eskola Klasse Paralela Salele, Sabadu (22/06).
Kordenador ESGP Klasse Paralela Salela Daniel Cardoso hatete atividade hadi’a ka taka sala eskola sira ne’ebé kuak, material sira ne’e mai hetan tulun husi kompañia lubuk ida parte Tilomar balu ajuda semente no balu ajuda rai hanek.
“Atividade ida ohin ne’ebé ami halo servisu inklui husi estudante, profesor no profesora sira hotu ne’ebé hamutuk ami halo reabilitasaun de’it ba ami nia turma ka sala ne’ebe maka kuak halo konta ita taka kuak de’it ba ida ne’ebe kuak, material sira ne’ebe mai husi fornesedor sira balu, ne’ebé sira kompañia lubuk ida husi parte Tilomar nian, ne’e maka iha kompañia 5 maka fo ona sira nia kontribuisaun rai henek no semente, kompañia 5 maka hanesan Mica Sotiva Unipesoal Lda kontribui rai henek ret-2, kompañia Foho Mesak Unipesoal Lda kontribui semente saku-10, kompañia Sajoremcor Unipesoal Lda kontribui rai henek ret-1, kompañia Boki Tuna kontribui semente saku-2 no kompaiña asalak Rai Sorte Unipesoal Lda, sira kompañia lima ne’e maka fo ona kontribusaun maka ohin loron ami hodi hadi’a ona ne’e, inklui ohin rasik mos ita nia administrador Postu Administrativu Tilomar mai observa hodi hare ba ita nia servisu iha loron ida ohin ba reabilitasaun eskola nian” nia dehan.
Nune’e mos Diretor kompaña Kasalak Rai Sorte, Elias Agustinho haktuir liu husi kontribuisaun ida ne’e la’os mai ho intensaun buat seluk maibe hanesan Tilomar oan hakarak oan sira ba eskola tuur iha fatin ne’ebé di’ak no hakarak duni atu dezenvolve postu Tilomar.
“Ha’u nia kompana naran Casalak Rai Sorte Unipesoal Lda, iha ne’e husi autoridade lokal mos ho ita nia Administrador Postu Tilomar rekomenda ba kompañia iha Suku Maudemo nia laran, ami hetan kontribuisaun semente iha saku-5 ba ami nia oan sira nia eskola ida ne’e, ne’ebé eskola ida ne’e mos ami hanoin katak kontribuisaun maibe ami fiar an katak ne’e ami nia oan, ami nia eskola maka ami hodi mai oferese semente ne’e la’os hanoin katak ba iha buat seluk, maibe ami hanoin katak ida ne’e di’ak ona ba ami nia oan sira nia futuru no di’ak mos ba ami, nudar Tilomar oan iha Suku Maudemo ida ne’e hakarak atu dezenvolve ba suku ne’e laran iha postu ida ne’e aban bainrua lao di’ak karik mos ami maka bele hanoin katak ida ne’e ita nia suku, ita nia postu ita nia rai” nia dehan.
Enkuantu tuir observasaun jornalista iha terenu nota katak APA Tilomar ho profesor no profesora inklui estudante sira halo reabilitasaun ba ESGP Suai Klasse Paralela Salele iha sala 3, no tuir informasaun katak eskola refere hari iha okupasaun Indonezia maibe iha era ukun-an ida ne’e governu troka ba troka to’o iha governasaun da-sia maka foin halo reabilitasaun.
Jornalista : Julio Salinas
