Hafoin halo sorumutu ho membru konsellu suku sira APA Suai, kompremetidu atu esforsu buka dalan hodi fo kapasitasaun membru konsellu suku sira atu bele komprende dia’k liu konaba priense livru 18.
“Administrador Postu bolu konsellu suku sira hotu inklui ofisial sekretaria suku atu halo reuniaun ida ne’e hodi bele evalua fila fali servisu balu realsiona ho dadus total populasaun, kartaun xefe de família. tanba dala ruma kartau xefe familia balu laiha no livru 18 ne’ebé hela iha suku sira, tanba livru 18 sira ne’e atu priense konaba dadus sira ne’e, livru expedisi, livru karta tama no sai, livru ba iha area dezenvolvimentu ne’ebé hala’o iha ita nia suku,” Informa APA Suai, Ildefonso Maria Amaral ba jornalista sira iha salaun enkontru Administrasaun Postu Administrativu Suai, Tersa (12/06).
“Priense livru ida ne’e, balu laiha koñesimentu karik ha’u sei halo pedidu ida ne’e hodi hasa’e ba Prezidente Autoridade Munisipiu atu nune’e hodi bele fo kapasitasaun ba membru konsellu suku sira hodi bele kompriende di’ak liu tan lala’ok livru 18 ne’ebé suku iha, durante ne’e sira priense hela buat balu la’o di’ak tuir ami nia observasaun maibe presija kapasitasaun ba sira nafatin, durante ne’e sira tuir deit formasaun konaba lei poder lokal” Tenik APA Suai.
Xefe Suku Beko Arlindo Bernadinho Lemos, haktuir kapasitasaun ba konsellu suku sira ne’e pertenente tebes, liliu ba ofisial administrasaun atu komprende di’ak liu konaba prinesamentu livru 18 iha suku.
“Pertenente liu ba ofisial administrasaun na’in-3 ne’ebé maka rekruta ona iha fulan hirak liu ba, xefe suku akompaña, la’os xefe suku maka hatene muito bem konaba ida ne’e, maibe xefe suku akompaña hodi hatene, maibe importante liu ema ne’ebé atu hatene konaba priensementu livru 18 lala’ok atu hala’o servisu administrasaun iha suku ne’e ofisia, sira ne’ebé maka rekruta ona iha nonu governu ne’e maka nia tenke hatene liu, ne’ebe ida ne’e importante tebes tanba depois rekruta tiha ofisial na’in-4 ne’e seidauk iha formasaun ne’ebé sira seidauk hatene ida-idak nia servisu ne’e” dehan Xefe suku.
Entertantu enkontru ida ne’e realiza husi Administrador Postu Administrativu Suai, Ildefonso Maria Amaral, ne’ebé hala’o iha Salaun enkontru Administrasaun Postu Suai, partisipa husi xefe suku na’in-5 hanesan Suku Beko, Kamanasa, Debos, Suai-Loro no Labarai ho xefe aldeia sira, delega no delagadu sira hotu.
Jornalista : Julio Salinas, Zavara Revolta
