Covalima (RCCT) 14-11-23—Postu Administrativu (PA) Suai, kompostu husi suku lima, ne’ebé realiza eleisaun orgaun suku iha preimeiru ronde Suku Beko, Debos Kamanesa, Labarai no Suai-Loro, maibe suku hat deit mak avansa ba eleisaun segundu ronde, tanba iha Suku Debos hela deit iha primeiru ronde tanba komunidade sira depozita konfiasaun ba Xefe Suku Atual re eleito fali ho votus liu pursentu 50+1.
Tanba ne’e, Administrador Postu Administratuvu (APA) Suai. Luizino do Rego, konsidera kandidatu xefe suku na’in 4 ne’ebé eleitu iha eleisaun segundu ronde maioria iha ona esperiensia atu bele lidera suku, tan husu ba kandidatu na’in 4 atu hatudu reponsabilidade hodi dezenvolve suku no hadi’a povu nia moris iha mandatu tinan 7 nia laran.
“Lia menon ba sira na’in 4 eleitu, ida re-eleiru hanesan iha Suku Beko atual xefe suku maka re-eleitu no suku tolu seluk mak kandidatu foun hanesan suku Kamanasa mesmu nia foun ne’ebé eleitu ba iha xefe suku, maibe nia esperiensia iha tanba sai xefe aldeia kuaze tinan 20 ona, mai fali Suku Suai-Loro mos hanesan uluk antes iha tinan 2004 mai to’o 2010 sai ona hanesan xefe suku no horseik eleisaun segundu ronde ne’e nia eleitu fali ba xefe suku, iha Labarai mos hanesan ita nia joven ida eleitu ba xefe suku kompete ho xefe suku atual, ba sira na’in 4 eleitu ha’u nia lia menon maka ne’e oinsa maka ita bo’ot sira povu fo fiar atu sai sira nia liman, ain, sira nia matan no tilun atu nune’e servis ita nia povu ho di’ak liu iha tinan 7 oin mai, servi sira hotu hanesan ne’ebé la’os ita bo’ot sira nia apoiantes maibe ita boot sira eleitu ona, eleitu ba povu hotu” nforma Administrador Postu Administrativu Suai, Luizinho do Rego ba RCCT iha Sede Suku Debos Tersa ne’e.
Entertantu tuir observasaun Administrador Postu Suai katak durante eleisaun orgaun suku ba segundu ronde la’o ho di’ak tanba sentru votasaun iha aldeia hotu termina tuir oras no hotu-hotu entrega ona sasan sira ba meja eleitoral suku no ohin tersa komesa realiza fali apuramentu akta kontajen inisial iha sede suku 4 ne’ebé hala’o eleisaun segundu volta.
Jornalista : Julio Salinas
Editor : Chamot Nahac
