Covalima (RCCT) 06-05-24-Administrador Postu Administrativu (APA) Suai, Ildefonso Maria Amaral Segunda feira ne’e sai sasin no ko’a fita ba Uma Naroman ba Povu (UNP) 2022 nian ho total uma kain-9.
Hafoin remata ko’a fita no entrega uma, APA Suai Ildefonso Maria Amaral, husu ba benefisariu sira atu kuida di’ak uma ne’ebé governu esforsu hodi harii ona ba povu atu hela ba.
“Hau nia mensajem ba benefisariu sira katak ida ne’e maka ita nia governu prepara ona kondisaun uma, oinsa atu bele ba hela, no husu benefisariu sira bele kuidadu uma ne’e, tuir prosesu uma ida ne’e aban bainrua labele mosu problema entre familia tanba iha momentu prosesu ne’e ita la’o ho akordu ka konkordansia ida entre familia, hanesan administrador postu rekomenda laiha tan problema ba benefisariu sira bele hela ona iha uma ne’ebé governu entrega ona ba benefisariu sira no husu nafatin atu asegura uma ida ne’e ho di’ak atu nune’e ambiente bele di’ak ba oin nafatin” dehan APA Suai Ilfonso Maria Amaral ba RCCT hafoin remata entrega uma ba benefisariu sira iha Aldeia Sanfuk, Suku Kamanasa, Segunda (06/05).
Diretór PNDS Munisipiu Covalima, Pedro de Araujo Gomes, hateten antes atu entrega Uma Naroman Povu, realiza uluk enkontru ho benefisariu sira hodi ko’alia konaba akuntabilidade liliu ba prosesu konstrusaun UNP 2022 nian iha Suku Kamanasa.
“Atividade ba ohin loron nian ami hala’o ne’e maka hanesan sorumutu akuntabilidade ikus ho objetivu atu bele entrega ona uma ne’ebe konstrui iha 2022 total hamutuk uma-9 iha Suku Kamanasa kompostu husi aldeia-3 hanesan Aldeia Fatuisin, Manekin no Sanfuk ne’ebé kada aldeia konstrui uma-3 ba benefisariu hamutuk uma-9, gastu orsamentu hamutuk $ 153,000.00 (rihun atus ida lima nulu resin tolu dolares Amerikanu) tanba kada uma kain ida gastu osan ho montante $ 17,000.00, maibe osan restu husi $ 153,000.00 ida ne’e maka uza fali sosa mobiliariu ba iha benefisariu ida-idak ka sasan uma laran,” Diretór PNDS Munisipiu Covalima, Pedro de Araujo Gomes relata.
Nia dehan, tuir mata mata dalan PNDS kuandu halo ona sorumutu akuntabilidade ikus signifika katak uma ne’e remata ona, nune’e intrega ba benefisiariu atu bele hela ona ba iha uma refere.
Tan ne’e mak husu nafatin ba uma na’in atu kuidadu no kumpri deklarasaun ne’ebé antes selebra ona hodi labele fa’an uma ne’e ba ema seluk.
Benefisariu Feliciano Berlaka Maya, agradese ba governu bele harii ona uma no entrega ba benefisariu sira iha Suku Kamanasa.
“Ohin iha 6 de Maiu 2024 PNDS ekipa munisipiu hamutuk ho autoridade postu ho nivel suku no aldeia sai testamuña hodi entrega uma kain-9 mai ami benefisraiu sira iha suku ida ne’e, ami sente orgullu tanba ami forsa la to’o oinsa atu bele harii rasik uma, inklui ha’u rasik hanesan ema difisiensia ida halo buat ruma ladi’ak maibe grasa nai maromak nian governu bele loke matan hodi tulun harii netik uma ida mai ha’u, kontente tebes tanba governu hanoin ami ne’ebé forsa laiha, ami agradese wa’in ba governu no husu ba governu ida ne’e ba oin ne’e bele ajuda maluk sira seluk ne’e halo di’ak liu tan” informa Benefisariu Feliciano Berlaka Maya.
Entertantu atividade serimonia entrega uma 9 ba benefisariu sira ne’e hala’o iha Aldeia Sanfuk. ne’ebé hetan partisipasaun masimu husi ekipa PNDS munisipiu, APA Suai, xefe Suku, Offisial Polisia Suku (OPS) Kamanasa, inklui xefe aldeia sira hotu no benefisariu siraiha Suku Kamanasa.
Jornalista : Julio Salinas
