Covalima (RCCT) 05-01-24—Administrador Postu Administrativu Maukatar Constantino do Carmo Cardoso sadik Xefe Matai eleitu Nuno Jose M. Pereirra hatur matenek no k’bit ne’ebé iha hodi dezenvolve suku no hadi’a komunidade nia moris.

Administrador Postu Administrativu Maucatar Constantino do Carmo Cardoso mos dehan jerasaun foun tenke sai lider ida ne’ebé di’ak liu iha Postu Maukatar.

“Xefe Suku Eleitu Matai, ita bo’ot nia prezensa mai ho istoria ida ne’ebé hakerek ona iha ita bo’ot nia liman no ha’u hare istoria ne’e brani duni, ne’ebé ita bo’ot brani duni, mas agora la’os tempu ita atu ko’alia konaba ema nia brani, maibe ita bo’ot tenke hatur matenek no k’bit ba ami nia komunidade Matai no sai hanesan lider ida ne’ebé uniku, lider ida mais di’ak liu iha Postu Maukatar, haree husi kapasidade hanesan lideransa xefe do suku, hanesan administrador postu durante tinan rua halo avalia ba ita tuir ha’u nia haree katak atan oan Nuno ne’ebé ohin loron sai xefe suku iha altura ne’eba asume kargu hanesan Pesoal Apoiu Administrasaun Suku Matai ha’u fo valor di’ak tebes, tanba haree husi aspetu ida nia badinas, ida nia pontualidade ida seluk nia halo administrasaun ne’e atu di’ak liu fali ha’u nia administrasaun iha Postu, valor ne’ebé ha’u fo labele kontente liu tanba buat bo’ot maka ita atu hasoru iha tinan 7 oin mai ne’e, tan ne’e ha’u nia hameno eleisaun foin daudaun ne’e hotu-hotu fo votus konfiansa ba ita bo’ot so labarik ki’ik deit maka la fo votus, ne’ebé dala ida tan ha’u hamenu votus ne’ebé ita hetan husi inan aman sira, ukun no bandu sira ita bo’ot labele soe deit iha dalan klaran no labele soe deit ita nia ukun ne’e iha tahu laran” Administrador Postu Administrativu Maukatar Constantino do Carmo Cardoso, hato’o lia hirak ne’e hafoin partisipa iha serimonia kultura no missa agradesimentu ba Xefe Suku no Konsellu Suku Matai ne’ebé hala’o iha Uma Dato Matai, Sesta (05/01/2024).

Xefe Suku Sasante João Gusmão husu ba konsellu suku foun kontinua halo dezenvolvimentu ne’ebé la konsege finaliza durante nia mandatu 7 nia laran.

“ha’u hanesan xefe suku sesante hakarak atu hato’o netik lia fuan ida ba imi hotu iha kalan ida ne’e liliu ba juventude, ba membru konsellu suku ne’ebé eleitu atu bele rona no halo tuir buat ne’ebé di’ak no at iha tempu pasadu no oinsa para atu bele hadi’a iha futuru durante iha imi nia mandatu tinan 7 ida ne’e, ha’u hakarak atu dehan de’it katak durante ami nia mandatu, sira balu iha na’in ida ka rua re-eleitu, xefe suku Nuno la’os ema foun iha ha’u nia mandatu nia ha’u nia PAAS ne’ebé problema saida maka suku Matai hasoru ne’e nia mos hatene durante ne’e, ne’ebé xefe suku atual ne’e la’os ema foun, servisu balu ne’ebé iha ami nia mandatu ita hotu sente ha’u lalika konta iha matan, iha tilun ita hotu rona no haree katak buat balu ami halo, buat balu la konsege halo, tanba buat hotu-hotu dezenvolvimentu ne’e mai husi nasional, postu no munisipiu suku iha poder so hato’o deit, ne’ebé sai mak ami halo ona iha rai Matai durante tinan 7 ha’u rasik haree no hatene” nia dehan.

Xefe eleitu Matai Nuno Jose M. Pereirra hatete, sei nakloke hodi servisu hamotuk ho entidade hotu iha suku matai hodi halo dezenvolvimentu.

“ha’u hatene katak kalan ida ne’e kalan k’solok ba ita hotu, kalan ida ne’ebé nakonu ho domin nakonu ho alegria, atu hatete de’it katak ohin kalan ida ne’e ita atu festeza vitoria ba ami hirak ne’ebé kandidata-an ba xefe suku, ba xefe aldeia, delegada-delegadu xefe joven feto no mane no mos ba lia na’in katak ba Matai ida ne’e laiha ida maka lakon, Matai ida ne’e hotu-hotu manan, tanba ne’e atu informa katak ba oin liliu ba ami ne’ebé maka reprezenta rai Matai ida ne’e atu servisu nafatin hamutuk ho imi liliu ba joven intelektual sira hotu, ba inan aman sira ami hotu-hotu sei servisu hamutuk ho imi, imi mos tenke servisu hamutuk ho ami oinsa ita bele kontribui netik ba konstrusaun estadu liliu ba Suku Matai ida ne’e” nia informa.

Entertantu partisipasaun iha serimonia kultural no missa agradesimentu ba xefe suku no konsellu Suku Matai ba periodu 2023-2030 ne’e hetan partisipasaun husi reprezenta Sekretariu Estadu Dezenvolvimentu Lokal, Sekretariu Munisipiu Covalima, Administrador Postu Administrativu Maukatar, parte igreja inklui komunidade Matai tomak.

Jornalista : Julio Salinas, Moi Chung

Editor : Chamot Nahac