Covalima (RCCT) 24-01-25-Tuir Xefe Unidade Eeletrisidade Timor-Leste Empreza Publiku (EDTL.EP) Munisipiu Covalima, Anorito Mendonça, informa konaba akontese eletrisidade ne’ebé dadaun ne’e lakan-mate bebeik kauza husi isolator fuga (bocor) no ligasaun balun iha vila laran sei uza liña antigu ne’ebé Governasaun Indonesia husik hela iha 1999.
Anorito realsa, Ai hun bo’ot sira ne’ebé buras iha estrada ninin besik rin eletrisidade mos ho impaktu ba ahi mate wainhira akontese udan no anin.
Xefe Unidade EDTL.EP Covalima hato’o ona lamentasaun hirak ne’e iha reuniaun kargu xefia iha Dili, atu hare no tau matan ba preokupasaun komunidade Covalima nian ne’e ho seriu.
Notisia Relevante : https://www.rcct.tl/administrador-postu-administrataivu-zumalai-kestiona-eletrisidade-lakan-mate-hahu-kedas-iha-fulan-dezembru-2024/
“Konaba preokupasaun publiku hanesan ita hotu hatene katak problema ahi mate-lakan ne’e agora daudaun ha’u bele hatete katak liña ne’ebé ejiste kota (vila) laran ne’e hanesan liña antigu sira uluk nian kedas, tempu okupasaun Indonezia nian, ne’ebé agora atu halo reabilitasaun sei iha faze kontinuasaun ne’ebé kompañia ne’ebé uluk halo obra ne’e ate agora seidauk halo kontinuasaun, kauza seluk hodi halo ahi mate-lakan ne’e parte ida mos mai husi asesores balu, isolator ne’e bocor, ne’e afeta mos ba ahi mate, kauza ahi mate ne’e mos dala ruma fiu kona ai ida ne’e mos afeta ba hotu ahi mate ne’e labele ses husi ida ne’e.” dehan Xefe Unidade Eeletrisidade Timor-Leste Empreza Publiku (EDTL.EP) Munisipiu Covalima, Anorito Mendonça.
Xefe Unidade EDTL.EP Munisipiu Covalima, Anorito Mendonça, konfirma konaba eletrisidade lakan- mate iha Postu Administrativu Zumalai, impaktu husi ligasaun fider3 ne’ebé konekta ba Zulamai, iha tempu udan no anin iha area refere bele fo impaktu ba eletrisidade mate-lakan, tanba dala ruma anin baku ai tahan konaba kabu ka fiu. Maske nune’e ekipa tekniku EDTL.EP Covalima nafatin esforsu fo naroman ba komunidade sira.
“Iha parte Zumalai ahi mate ne’e ligadu ba iha fider-3 nian ne’eb’e kobre ba to’o iha Lepo depois ba iha Raimea baliza ho Munisipiu Ainaro, kuandu iha Lepo to’o Ucekai mosu anin ai baku ba fiu balu, kona malu, ida ne’e mos afeta ba halo ahi mate, depois asesores balu maka rahun mos ida ne’e mos afeta ba ahi mate no dala ruma mos konsiensia ita nia alin ki’ik sira hatudu malandru (nakal) kaer ai lori tuda tiha ba kabu ka fiu ne’e ida ne’e mos afeta ba halo ahi mate” nia esplika.
Tuir Xefe Unidade Eeletrisidade Timor-Leste Empreza Publiku (EDTL.EP) Munisipiu Covalima, Anorito Mendonça, hatete ho preokupasaun publiku nian konaba ahi sempre mate-lakan iha Covalima nia parte hato’o ona liu husi Reuniaun Konsellu Koordenasaun Munisipal, ba Prezidente Autoridade Munisipiu Covalima (PAM) hodi relata konaba impaktus husi eletrisidade mate-lakan durante ne’e.
Jornalista : Julio Salinas
Editor : Chamot Nahac
