Covalima (RCCT) 27-03-25-Relasiona ho aniversariu Polisia Nasional Timor-Leste (PNTL) Prezidente Republika Jose Manuel Ramos Horta, fo parabens ba Estadu Timor-Leste ne’ebé selebra eziztensia Polisia Nasional Timor Leste (PNTL) ba dala rua nulu resin lima (XXV).
Prezidente Republika Jose Manuel Ramos Horta, hatete, tinan ne’e selebrasaun aniversariu PNTL ba dala XXV sei prezidi husi Primeiru Ministru, Kay Rala Xanana Gusmão, nune’e hanesan Prezidente Republika hato’o votus parabens ba instituisaun siguransa estadu nian PNTL ne’ebé dura ona to’o tinan XXV.
“Parabens ba estadu, la’os fo parabens deit ba PNTL, tanba organizasaun estadu tama ona ba tinan 20 resin maka hari PNTL ho nia espesialidade barak hodi garante ordem publika iha rai karan,” Prezidente Republika Jose Manuel Ramos Horta dehan lia ne’e iha resintu Administrasaun Munisipiu Covalima (26/03).
Xefe Estadu Timor Leste ne’e konta “Ha’u iha esperiensia klean pelumenus sistema Nasoens Unidas, uluk iha Guinea-Bissau reprezenta Sekretariu Jeral ONU no iha ha’u nia mandatu mos tau matan ba sira fo seguransa iha Guinea-Bissau iha rejiaun Afrika Osidental tomak, hare mos ba iha reforma polisia, forsa armada iha Guineia Bisau, iha rai laran akompana desde momentu hahu harii FALINTIL, hau bele hatete instituisaun rua iha Timor ne’e PNTL servisu di’ak em jeral di’ak liu rai barak iha mundu ne’e, tanba hau temi buat ne’ebe hau halo, hau kuinese tanba iha komprendesaun, F-FDTL mos iha konseitu di’ak no profesional, parabens ba PNTL” Tenik Ramos Horta.
Prezidente RDTL dehan, Governu iha responsavelidade masimu atu hadi’a liu tan instituisaun siguransa estadu nian PNTL
“Koko ko’alia ho Primeiru Ministru, Ministru Interior no Komandante Jeral PNTL atu bele hare momentu ne’e presija tan saida, maibe ha’u hatete deit ne’e kna’ar responsabilidade governu nian” informa Prezidente Republika Jose Manuel Ramos Horta ba jornalista sira iha Covalima.
Prezidente Republika Jose Manuel Ramos Horta, hatete ho aniversariu PNTL ba dala-XXV hanesan Prezidente Republiku, Jose Manuel Ramos Horta, hato’o parabens primeiru ba estadu Timor-Leste tanba estadu maka hari PNTL hodi garante seguransa iha rai laran, no fo parabens ba PNTL atu bele hala’o ordem ho profesional liu tan iha futuru.
Jornalista : Julio Salinas
Editor : Chamot Nahac
