COVALIMA—-Oras ne’e daudaun eskola 4 iha Munisípiu Covalima hetan estragus total tanba impaktu husi anin bo’ot ne’ebe hahu kedas iha fulan ikus Dezembru 2022 mai to’o loron 6 fulan Janeiru 2023.

Diretór Servisu Edukasaun Munisípiu Covalima, Rui Amaral Suri Seran, Informa tuir dadus ne’ebe tama iha edukasaun munisipiu katak ho akonte anin bo’ot durante ne’e mosu hodi rezulta eskola 4 mak hetan estragus total iha Covalima.

“Tuir informasaun ne’ebe tama hau simu husi Eskola Bazika Central (EBC) Bulu ne’e anin loke hotu kedas uma kakuluk no no kalen sira, EBF Zulo Tas mos anin loke kalen balu, EBF Dato Moris mos hanesan no EBF Aitos Fohorem anin loke kalen balu, informasaun ne’ebe tama mai iha edukasaun Covalima mak foin eskola 4 ne’e hetan estragus total” informa Diretór Servisu Edukasaun Munisípiu Covalima, Rui Amaral Suri Seran, ba jornalista sira iha Administrasaun Munisípiu Covalima, Sesta (06/01).

Nia sublina kona-ba eskola sira seluk informasaun sei dauk tama, maibe to’o ohin loron foin rona mak eskola 4 ne’e.

Nia dehan relasiona ho eskola 4 ne’ebe hetan estragus total, parte edukasaun munisipiu segunda oin tenke hatama ona relatorio ba iha Ministériu Edukasaun Juventude no Desportu atu bele haree hodi foti desizaun ruma, se lae oan sira atu eskola iha ne’ebe karik la responde lalais kona-ba eskola hetan ona estragus ne’e.

Nia afirma se eskola 4 ne’ebe hetan estragus ne’e MEJD la foti desizaun lalais maka oan sira atu eskola iha ne’ebe tanba agora atu prepara tama ba iha prosesu aprendisajem anoletivu 2023.

Entertantu ho anin ne’ebe boot hahu husi tinan ikus 2022 noan mai to’o tinan 2023 ne’e hodi estraga ona komunidade nia uma hela fatin no fasilidade publiku sira hanesn rin eletrisidade no fasilidade eskola sira iha Covalima mak hetan ona estragus total.(Azu)