Covalima (RCCT) 04-07-2024-tuir rezultadu husi Servisu Munisipal Ajensia Fiskalizasaun nian ne’e hala’o foin lalais konsege deteta funsionariu balu viola oras servisu.
Diretor Ajensia Munisipal Fiskalizasaun Covalima Anacleto Martins, hatete erru deteta durante halo fiskalizasaun maka funsionariu balu tama servisu la tuir oras, maibe iha lista prejensa asina tuir oras servisu.
“Ligadu ho disiplina servisu ita deteta erru balu hanesan iha funsionariu balu hare tama servisu sira la tuir oras, maibe iha ne’eba sira asina iha oras lista prezensa no balu fali iha ne’eba sira laiha, sira lisensa halo justifikasaun liu husi telefoni ba diretor munisipal sira maibe iha ne’eba lista prezensa ne’e sira asina,” informa Diretor Ajensia Munisipal Fiskalizasaun Covalima Anacleto Martins.
“Erru sira ne’e ami tenta hato’o ba Prezidente Autoridade Munisipiu (PAM), depois ami halo kordena fila fali servisu ba iha servisu munisipal administrasaun rekursu humanu oinsa ba oin ne’e ita atu hare didi’ak liga ho lista prezensa karik ema balu iha ne’eba tama tarde iha minutu 30 ka iha oras ida tama tarde ou sai sedu saida maka ita tenke halo ba ema ne’e ka funsionariu refere, tan ne’e ba oin ami presija kordena no kolabora ba iha servisu munisipal administrasaun rekuru humanu para atu hare asuntu ida ne’e ho klean” Tenik nia.
Alende ne’e iha atividade fiskalizasaun ne’e deteta funsionariu balu tuliza veiklu estadu fora husi oras servisu hodi halo atividade privadu.
“Bazea ba despaixu husi Prezidente Autoridade Munisipiu iha ne’eba atividade lubuk, ida maka liga ba veiklu estadu funsionariu sira ne’ebé maka uza patrimoniu estadu fora husi oras servisu,” nia informa tan.
Enkuantu tuir Diretór Ajensia Munisipal Fiskalizasaun Covalima Anacleto Martins mos dehan sei tun ba iha terenu liliu ba iha suku, postu no diresaun sira hodi halo fiskalizasaun liliu ba disiplina servisu no funsionariu publiku sira uza veiklu estadu.
Jornalista : Julio Salinas
