Covalima (RCCT) 17-02-21- Nudar humanu tenki hatur an iha uma creda hodi rekonhese ita nia an katak ema moris husi rai sei fila fali ba rai, tanba ne’e ahuk desan nebe kose iha rentos fo oportunidade ema kristaun hadera an (jejun) hodi selebra paskoa ho haksolok.
Iha selebrasaun misa ahuk desan iha Ave Maria Suai Amo selebrante Padre Sebastião Eugenio da Cruz Coreia, hatuir iha omilia dehan coresma fo oportunidade ba sarani sira atu hodi koreksaun sira ida idak nia an liga ho pandemia covid -19 nebe mak atu tama tinan ida ona iha rai doben Timor Leste.
“Tempo Ida ne’e fo oportunidade mai ita atu ita halo koreksaun ba ita ida idak nia an liga ho pandemia covid -19 tinan ida ona moras ida nee iha ita nia rai doben ida ne’e. moras ida ne’e halo ita duvida, maibe moras ne’e mos halo ema mate bara barak ona, ne’e hatudu katak moras ne’e iha duni” Esplika Amo Paroco Paroquia Igreja Padre Sebastião Eugenio da Cruz Coreia iha nia Omilia.
Amo parocu mos Esplika ema matenek barak luta atu hodi halakon moras Covid -19, liu husi sira nia matenek oi-oin nebe iha, maibe to’o agora sedauk deskobre lolos oinsa atu bele kura moras ida ne’e.
“ema luta oinsa atu halakon moras ida ne’e, iha ema barak ho nia matenek oi-oin kria makina oi-oin, kria aimoruk oi-oin maibe sedauk deskobre lolos oinsa atu bele kura moras ida ne’e, tanba ne’e iha tempo koresma ne’e fo oportunidade mai ita, keta ita iha sala karik, ne’e mak maromak rai hela hirus mai ita” Amo Sebastião Esplika.
Iha nia Omilia Amo Selebrante mos husu ba sarani Kristaun hotu iha Covalima atu hateke nia ai kruz hanesan salvasaun, tanba ho fiar ba Kristu nia Grasa, no kanek ran nebe sulin sei kura moras no terus hotu-hotu.
“hateke ba Kristu, iha ai krus hun nia sei hetan salvasaun, moras no kanek sira sei hetan fali di’ak tanba nia hateke kristu ho fiar metin no hadomi mak grasa bensun nebe naksulik husi sorin kanek sei lemo ba ita ida idak hodi kura ita nia terus no moras hotu” Amo Esplika.
Amo Selebrate Misa ahuk desan iha Igreja Ave Maria Suai, Padre Sebastião, hanesan mos amo pakokia ba Igreja suai mos dehan. “Tempo quaresma nee tempo ida neebe di’ak tebes atu ita fila hikas ba aman maromak nia uma no domin nebe mak sulin mai ita liu husi ninia oan jesus kristo nebe mak mate iha kruz hodi suli mai ita ran ho we no husu ba ita atu husu na’i maromak nia bensaun liu liu iha tempo quaresma ida nee ”.
Entretanto amo parocu ne’e mos husu ba sarani sira atu halo jejun hodi haterus an iha tempo Koresma nune’e bele hetan perdaun ba ita nia sala sira no mana induljensia.
Jornalista : Jhana Cardoso
Editor : Chamot Nahac
