Covalima (RCCT) 08-05-25- Administrasaun Munisipiu Covalima (AMC), liu husi Servisu Munisipal Aprovizionamentu (SMA) hahu hala’o aktu abertura ba proposta liu husi oferta kotasaun ho Kompañia lokal hamotuk 17 maka submete ona dokumentus hodi kompete ba tenderizasaun Projetu Planu Dezenvolvimentu Intregradu Munisipal (PDIM) 2025 hamotuk 3 iha Covalima.
Prezidente Komisaun Aprovizionamentu Munisipal(P-KAM), atual Sekretariu Munisipal Administrasaun no Finansas Munisipiu Covalima, Alberto Moniz de Araújo, relata projetu PDIM 3 ne’e kompostu husi konstrusaun residensia pesoal ba saude iha Dato Tolu, Fohorem, Konstrusaun Sentru Saude Fatumea no konstrusaun Kanal Irigasaun Ailok Fatuk Ahu, Zumalai.
“Ohin ita halo sorumutu ba loke konskursu publiku ba konstrusaun ba residensia pesoal saude iha Dato Tolu, Fohorem, Konstrusaun ba Sentru Saude Fatumea no konstrusaun ba Kanal Irigasaun Ailok Fatuk Ahu, Zumalai, iha Fatumea hamutuk kompañia tolu maka submete ona, ne’ebé ohin ita fo sai ona ninia volume panawaran ho montante, iha Dato Tolu hamutuk kompañia-8 no iha Postu Administrativu Zumalai ba kontrusaun Kanal Irigasaun hamutuk kompañia-6 maka halo kompetisaun, ne’ebé total kompañia 17 ne’ebé kompete iha konkursu tenderizasaun ida ne’e,” informa Prezidente Komisaun Aprovizionamentu Munisipal, atual Sekretariu Munisipal Administrasaun no Finansas Munisipiu Covalima, Alberto Moniz de Araújo, ba RCCT hafoin remata loke konkursu publiku ba kompañia sira ne’ebe hala’o iha Salaun Administrasaun Munisipiu Covalima, Tersa (08/05).
Tanba ne’e, Alberto Moniz de Araújo, husu kompañia na’in sira atu servisu hamotuk tuir oferta projetu hodi hadi’a munisipiu Covalima.
“Hanesan Prezidente Komisaun Aprovizionamentu Munisipal ita kompañia hamutuk 17 ne’ebe maka submete ona fokumentus iha tenderizasaun ida ne’e manan ka lakon ne’e mesak kompañia Covalima oan, ita bo’ot sira servisu hamutuk ba tanba ne’e bazeia ba ita bo’ot sira nia penawaran ka kotasaun ne’ebé halo submisaun mai iha projetu-3 ne’ebé Planu Dezenvolvimentu Integradu Munisipal (PDIM) nian iha Munisipiu Covalima, tan ne’e husu ba imi servisu hamutuk ba se maka manan mos Covalima oan maka manan hotu” nia dehan.
Enkuantu aktu abertura ba proposta ka loke kotasaun (Open Beat) ba projetu-3 PDIM ne’e hala’o iha salaun Administrasaun Munisipiu Covalima ne’ebé partisipa husi Prezidente Komisaun Aprozionamentu Munisipal, atual Sekretariu Munisipal Administrasaun no Finansas Munisipiu Covalima, Alberto Moniz de Araújo, Diretór Servisu Munisipal Planeamentu Integradu no Dezenvolvimentu, Diretór Servisu Munisipal Apzionamentu Roberto Alvaro Gomes, Diretór Servisu Munisipal Ajensia Fiskalizasaun Anacleto Martins, Diretór Servisu Munisipal Obras Publika no Transporte, Sidonio Gusmão inklui na’in ba kompañia hamutuk na’in-17.
Jornalista : Julio Salinas
Editor : Chamot Nahac
