Covalima (RCCT) 18-02-25-Domingo foin lalais (16/02) kareta ambulansia multifunsaun ida baku fila iha kampung baru, Postu Administrativu Zumalai iha oras hale’u tuku 11 kalan, ne’ebé diskunfia motorista konduz kareta ho kondisaun lanu maibe seidauk serteza.
Kareta Ambulansia multifunsaun ne’e hetan asidente wainhira tula pasiente ne’ebé transfere husi Postu Saude Zumalai mai Ospital referral Suai. Tan ne’e Servisu Munisipal Saude Covalima forma ona ekipa ida hodi halo investigasaun ba kazu ne’e atu hodi bele hatene serteza konaba kazu ne’e.
“Loos iha duni asidente kareta ambulansia multifunsaun Sentru Saude Zumalai nian, ne’ebé akontese iha loron 16 de Febereiru 2025, iha Zumalai, parte Kampung Baru, Ambulansia Multifunsaun ne’e iha kalan bo’ot maizumenus oras tuku 11 kalan bainhira tula hela moras ida husi Sentru Saude Zumalai atu mai iha ospital Referal Suai, maibe to’o iha dalan k’laran hetan asidente, tanba ida ne’e maka horseik ami ba foti ona ambulsia lori mai ona iha ne’e.” informa Diretór Servisu Munisipal Saude Covalima Domingos Sequera ba jornalista sira iha nia kna’ar fatin Tersa (18/02).
Maske nune’e iha asidente rodaviariu ne’e la rezulta ema kanek, nune’e mos kareta ambulansia multifunsaun ne’e servisu Saude Munisipal evakua ona mai asegura iha edifisisu Servisu Saude Covalima. Maibe iha prosesu investigasaun mak hetan rezultadu kondotor konduz kareta ho lanu mak Diretór Servisu Saude Covalima sei foti desizaun hapara kondutor ne’e troka ho ema seluk.
“Ha’u rasik ba hare pasiente ne’e iha ospital referal Suai kondisaun di’ak uitoan ona, sim iha informasaun barak, ha’u mos akompaña maibe ha’u seidauk foti desizaun katak motorista ne’e kondus kareta ne’e ho lanu ka lae?, maibe liu husi informasaun sira ne’e ha’u forma ona ekipa ida atu tun hodi halo investigasaun para lori hatene loloos informasaun ne’e, bainhira rezultadu husi investigasaun ne’e mai maka dehan loos duni motorista ne’e kondus kareta ho kondisaun lanu ne’e hapara kedas nia hodi hare ema seluk” Tenik Nia.
Sorin seluk Administrador Postu Administrativu Zumalai, Alipio Magno, informa pasiente ka ninia komunidade na’in ida husi Suku Lepo, moras no baixa iha Sentru Saude Zumalai nune’e dotor sira rekomenda tenki transfere urjenti ba Ospital Referal Suai maka to’o iha dalan klaran ambulansia multifunsaun ne’e hetan asidente.
“Sim ambulansia multifunsaun Sentru Saude Zumalai nian baku fila iha Kampung Baru, kalan ne’e rona informasaun atu tula pasiente ida ho urjente husi Sentru Saude Zumalai ba iha ospital referal Suai, pasiente ne’e husi Suku Lepo, motorista ne’e mai foti tiha tanba iha momentu ne’eba doutor sira orienta katak pasiente ida ne’e tenki evakua lalais ba iha Suai ho ida ne’e parese kondotor kondus kareta husi sentru saude Zumalai kontinua mai to’o ponte mola nia rohan parte Kampung Baru nian hetan fali asidente” nia dehan.
Diretór Servisu Munisipal Saude Covalima Domingos Sequera, hakanas, rezultadu investigasaun hatudu mototrista ne’e kondus kareta ho lanu duni maka sei hapara kedas ninia kontratu no sei troka ho ema seluk.
Entretantu kareta Ambunsia Multifunsaun husi sentru saude Zumalai ho sapa matrikula 07 088 G ne’e baku fila iha Ponte Mota Mola ninia rohan parte Kampung Baru Zumalai, wainhira tula Pasiente husi Sentru Saude Zumalai transfere ba Ospital referral Suai.
Jornalista : Julio Salinas
Editor : Chamot Nahac
