Covalima (RCCT) 05-05-23, Prezidente Partidu Kmanek Haburas Unidade Nasional Timor Oan (KHUNTO), Armanda Berta dos Santos hatete iha kampaña eleitoral ne’ebe hala’o iha kampu Ladi, Kamansa, Suai katak, dezenvolvimentu iha rai laran atu lao diak presija seguransa.
“Dezenvolvimentu atu lao ho diak presija mos seguransa iha ita nia rai laran, politika, ranba ne’e joven sira mos tenke esforsu an iha vida sira hotu-hotu ” deklara Prezidente Partidu Kmanek Haburas Unidade Nasional Timor Oan (KHUNTO), Armanda Berta dos Santos ba militantes no simpatizante sira iha Kampu Ladi.
Armanda Berta dehan karik povu fo fiar nafatin ba Partidu KHUNTO hodi aumenta kadeira iha Parlamentu Nasionál sei ko’alia diak liu tan iha setór sira hotu-hotu, hodi hadi’a iha setor sira hotu maka hanesan setor saude, edukasaun no setor sira seluk.
Nia hateten, seror edukasaun sai hanesan save ida ba iha dezenvolvimentu nasional iha pais ida ne’e, saude mos, ekonomia mesmu lao neneik maibe sei haree diak liu tan, saida maka atu halo ekonomia ida ne’ebe di’ak hodi sirkula iha rai laran.
Ba infraestrutura, bee moos, agrikultura sira oinsa atu irigasaun sira bele funsiona ho di’ak hotu, atu nune’e natar na’in sira bele produs produtu lokal iha rai laran rasik nune’e Timor-Leste labele dependente demais ba iha importasaun sira.
Nune’e mos Konsileiru Masimu Partidu KHUNTO José dos Santos Naimori Bukar, hatete agora ko’alia ladiak ona tanba partidu tolu halo ona plataforma maka hanesan FRETILIN, PLP no KHUNTO.
“Agora FRETILIN, PLP KHUNTO hamutuk fila fali ona ne’e ita atu ko’alia halo nusa, ne’e ko’alia ladiak, ne’e araska uitoan, matenek na’in 6 sira trata hau, maibe hau dehan hanesan ne’e o la presija trata hau, maibe hau mai ne’e ho fuan la hanesan o, tanba o bidu an iha avo nia oin tan projetu, mas ba hau lae ida” deklara Naimori.
Naimori haktuir KHUNTO nia luta maka oinsa Timor oan atu sai 8da deit, oinsa Timor oan haluha tiha fatuk, ai ho katana ne’ebe sempre lori duni malu, mai hamutuk soe tiha buat sira ne’e hodi haree ba oin.
Naimori husu ba joven sira tenke fiar malu, labele haree ba politik halo ema mai bosok fali hodi haluha tiha liberdade, haluha tiha maun alin, kolega vizinho ne’ebe loron kalan moris hamutuk ne’e labele.
Entertantu kampaña eleitoral Partidu KHUNTO nian hala’o iha kampu Ladi lao ho diak tanba hetan apoiu seguransa husi polisia, no observa direita husi observador PDHJ, no CNE.
Jonarlista : JS
