Covalima (RCCT) 01-04-23-Sekretaria Jeral Partidu FRETILIN Mari Alkatiri dehan labele nega Xanana nia istoria, bainhira nega istoria maka aban bain rua nega istoria rasik.
“Istória ita labele nega wainhira ita nega impaktu ida husi istória aban bainrua ita nega ita nia istória, maibé Xanana ida agora ne’e adversariu bo’ot FRETILIN nian, durante tinan 24 FRETILIN sai inimigu ba Indonezia, agora FRETILIN sai adversariu bo’ot ba Xanana” informa deklara Sekretaria Jeral Partidu FRETILIN Mari Alkatiri ba militants no simpatizante sira hafoin hala’o konsolidasaun partidu FRETILIN nian iha Aldeia Lakonak, Suku Debos, Postu Administrativu Suai, Sabadu (01/04).
Alkatiri dehan FRETILIN simu Xanana la rekonese ema seluk nega, agora liu tiha tinan naruk ko’alia fali komunista liliu FRETILIN repete fali saida maka Indonezia uza atu oho Timor oan sira, maibe parese istoria halo justisa.
FRETILIN hetan numeru sorteru 11 ne’e Novembru, Novembru ne’e fulan ida nakonu ho patriotismu, Novembru ne’e maka proklama independensia 1975, CNRT hetan numeru sorteru 12 ne’e Dezembru, dezembru ne’e fulan ida ne’ebe Indonezia halo invazaun iha Timor-Leste, tanba ne’e istoria halo justisa.
“Hau dehan dala barak ba Prezidente Republika José Manuel Ramos Horta, istoria maka sei halo justisa ba ita hotu, hau hasoru Primeiru Ministru iha semaba rua ka tolu liu ba kotuk hau ko’alia ida ne’e, hau la espera katak FRETILIN atu hetan numeru 11 no CNRT atu hetan numeru 12, halo ona justisa, se maka ba vota ba numeru 12 ne’e vota fulan ida Indonezia invade Timor-Leste, se maka vota ba numeru 11 ne’e vota ba 11 Novembru no vota ba 28 de Novembru ne’e vota ba FRETILIN” Alkatiri dehan.
jornalista : JS
Editor : CN
