COVALIMA—-Asistensia Legal ba Feto no Labarik (ALFELA) Kuarta (08/02) feira ne’e fo formasaun ba membru polisia sira iha Munisípiu Covalima haree liu ba iha lei No.3/2017 ko’alia kona-ba trafiku umanu.
Koordenador ALFELA ne’e dehan, atividade formasaun ida ne’e realiza ho objetivu atu hasa’e konesimentu membru polisia hotu-hotu ligadu ho lei trafiku umanu ne’e rasik, no mos atu eleva membru PNTL sira nia konesimentu hodi bele hatene atu identifika problema trafiku umanu ne’ebe sempre akontese iha komunidade nia let.
“Loron ida ohin ami husi Asistensia Legal ba Feto no Labarik (ALFELA), mai hala’o desiminasaun informasaun ba membru PNTL sira iha Munisípiu Covalima, haree liu ba iha lei No.3/2017 ko’alia kona-ba trafiku umanu” informa Koordenador Prevensaun no Advokasia ALFELA, Antoninho Marques, ba jornalista hafoin remata fo formasaun ba membru polisia sira ne’ebe hala’o iha salaun enkontru Komando PNTL Munisípiu Covalima, Kuarta (08/02).
Meus ne’ebe polisia bele uza tuir lei trafiku umanu ne’ebe mak iha atu bele fo atendimentu ba iha vitima trafiku umanu ne’e rasik, tanba lei ida ne’e foun ne’e maka presiza halo sosializasaun lei ne’e ba iha membru polisia, tanba sira mak serbisu besik ho komunidade liliu Official Polisia Suku (OPS).
OPS sira nia kna’ar serbisu besik liu ho komunidade, tan ne’e presija atu hatene no identifika problema ne’ebe mak komunidade sira hasoru liliu kona-ba trafiku umanu.
“Ida mos ita haree alende ida ne’e ita mos hatene katak Munisípiu Covalima munisipiu ne’ebe besik liu ho Indonezia, tanba ne’e ita haree katak iha risku no iha pontesia mos bele akontese trafiku umanu mai iha Covalima, atu asegura situasaun ida ne’e hodi hola parte atu bele halo prevensaun ba iha trafiku umanu presija hasa’e konesimentu ba membru polisia atu bele eleva sira nia konesimentu diak kona-ba lei ne’e, hodi hola parte, kolabora hamutuk hola medida hodi prevene no kombate trafiku umanu iha Timor-Leste” nià dehan.
Komandante PNTL Munisípiu Covalima Supe-rintendente Polisia Basilio de Jesus, haktuir Alfela mai fo formasaun ba membru polisia sira oinsa atu bele halo prevensaun kona-ba trafiku umanu.
“Alfela iha semana kotuk liu ba sira hato’o proposta mai iha komando PNTL Munisípiu Covalima proprio sira atu mai fo formasaun ba ita nia polisia sira kona-ba trafiku umanu iha lei No.3/2017 ne’ebe ko’alia liu ba iha prevensaun trafiku umanu, tanba ne’e mak sira nia proposta hau aprova ohin ita hahu halo abertura ba formasaun refere ho ita nia polisia Munisípiu Covalima involve membru polisia na’in-30 kompostu husi feto na’in-15 no mane na’in-15” informa Komandante PNTL Munisípiu Covalima.
Komandante haktuir ko’alia kona-ba trafiku umanu bele dehan katak serbisu polisia nian ida ne’ebe atua liliu iha Munisípiu Covalima kazu ida ne’e as tebes.
Tanba ne’e mak hanesan komandante munisipiu dehan ba membru sira ne’ebe partisipa iha formasaun ida ne’e hamutuk na’in-30 ne’e fo hatene ba sira aprende não okupa lugar, aprende ne’e ita la hadau ema nia kadeira, kuandu aprende bebeik hadiak kualidade serbisu diak liu tan.
Komandante afirma ho formasaun sira hanesan ne’e ligadu ho serbisu polisial mais importante ba iha vida polisia, ho nune’e polisia tenke akompaña dinamika dezenvolvimentu, dinamika sosial ne’e polisia tenke akompana se lae kazu barak akontese polisia barak ladun apar no ladun responde ba aktus sira ne’e.
Maibe ho formasaun sira ne’e talves ajuda tebes polisia, tanba buat kapasitasaun ne’e importante ba iha membru polisia sira, tan ne’e hanesan komandante munisipiu apresia no agradese tebes ba ekipa ida ne’e no motiva membru polisia hamutuk na’in-30 ho vontademente maske formasaun ne’e hala’o loron ida deit mais importante tebes.(Azu)
