Diretór Alfandega Munisipiu Covalima Nuno Nogueira, hatete makina X-Ray ne’e seidauk bele utiliza hodi halo SCAN ba kareta no sasan sira ne’ebé tama husi Atambua, Indonezia mai area juridiku Covalima tanba durante Mobile Cargo X-Ray sei tau provizoriu iha armamen.
“Konaba ita nia makina X-Ray ne’ebe ita nia Ministra Finansas halo inagurasaun tiha ona iha momentu ne’eba, agora daudaun ita sei hein hela fatin para atu utiliza, tanba ita para provizoriu iha armajen, seidauk utiliza ne’e tanba ita seidauk fatin propriu, wainhira makina ne’e mai para nia ain 4 ne’e tenke tun hamrik loos maka foin bele halo SCAN ba kareta ho sasan ne’e nia bele fo imagen ne’ebé di’ak hodi ajuda ita nia verifikador sira hodi halo intervensaun ba sasan, wainhira landasan laiha, ita rai iha ona maibe konstrusaun kompañia seidauk prepara, tan ne’e ita seidauk bele uza makina X-Ray nee, tanba deit nia landasan ladiak nia sistema eskema merkadoria ne’e hatudu images la di’ak” informa Nuno Noguiera ba jornalista sira hafoin partisipa iha seminariu kona ba procedementu legais ba Exportasaun No Importasaun ne’ebe hala’o husi Ministeriu Komersiu Indústria, liu husi Diresaun Nasional Komersiu Externa, ne’ebe hala’o iha Salaun enkontru ba Dame CNE Munisipiu Covalima kinta (14/11).
Nuno Fundamenta tanba governu gasta osan bo’ot hodi sosa Makina Mobile Cargo X-Ray, nune’e persija asegura didi’ak hodi bele garantia kualidade servisu atendimentu iha Liña Fronteira.
“Makina ne’e folin ne’ebé karun, ita para iha loro manas ne’eba, udan kona, anin kona nia bele at tiha, maibe kuandu ita rai deit iha mahon la utiliza ne’e la fo impaktu ida tanba ne’e sei kompetensia ba ita nia jestaun fronteira sira sempre halo moris hela deit maske la uza hodi halo SCAN, maibe agora ita rai makina X-Ray provizoriu deit atu labele kona udan, anin no loro nune’e labele at” nia informa.
Entertantu Governu Liu husi Ministeriu halo ona lansamentu ba Mobile Cargo X-Ray no Body Inspection iha Fronterira Postu Integradu Salele iha loron 10 fulan Maiu tinan 2024. No iha Lansamentu ne’e partisipa husi Autoridade Servisu fronteira Motamasin Malaka NTT Indonesia, reprezentante Bupati Malaka, Kapolres Malaka, Beacukai Indonesia mak destakada iha Fornteira Mota Masin Malaka NTT, no Autoridade Covalima reprezenta husi Sekretariu Munisipal Asuntu Sosiais no Organizasaun, Komandante PNTL Covalima, Reprezentante Ministeriu Intereior, no partisipa direta husi Ministra Finansas, Komisariu Autoridade Aduaneiru Interinu, Funsionariu Alfandega sira no mos instituisaun sira mak destakada iha fronteira postu integradu salele.
Notisia relvante : https://rcct.tl/governu-lansa-makina-ex-ray-no-body-protection-iha-fornteira-salele/
Jornalista : Julio Salinas
Editor : Chamot Nahac
