Covalima (RCCT) 23-04-25-Durante ne’e so uniku Kompañia Madarlin.Unipesoal.Lda deit maka halo atividade exportasaun produtu lokal (kami) husi Covalima ba Indonezia liu husi Fronteira Postu Integradu Salele.
Nune’e Diretór Alfandega Munisipiu Covalima Nuno Nogueira, nafatin enkoraja kompañia local sira iha Covalima atu labele lakon oportunidade hodi bele hala’o mos ataividade exportasaun merkaduria liu liu podutu local timor husi covalima ba nasaun vizinu Indonesia.
“Kompañia Madarlin deit maka rejista iha ne’e, halo exportasaun kamii, maibe la taka dalan mos ba emprezariu Timor oan sira seluk bele esforsu an hodi identifika merkadoria liliu ba sasan sira iha ita nia rai laran ne’e oinsa hodi hetan lisensa ba halo exportasaun para kompete iha merkadu, maibe kuandu ita depenede deit ba iha importasaun, kuandu importa mai ho volume bo’ot maibe osan sira ne’e sei la metin iha ne’e sei semo sai hotu ba rai liur tanba ida ne’e maka emprezariu lokal sira nia prezensa hodi tulun ita nia produtu lokal sira oinsa para buka dalan halo exportasaun hodi tulun ekonomia rai laran” Diretór Alfandega Munisipiu Covalima Nuno Nogueira.
Diretór Nuno, haktuir durante ne’e Kompañia Madarlin.Unipesoal,Lda mos kontribui reseita ba estadu liu husi atividade exportasaun no mos kontribui ba rendimentu ekonomia rai laran.
“Ita mos halo exportasaun maibe ita sura ho liman fuan de’it, signifika fulan ida ka rua kareta ida ka rua tula sai kamii liu husi postu integradu Salele ba iha Indonezia, durante ne’e kamii de’it produtu seluk laiha, maibe iha importasaun maka tama mai barak osan sira sai hotu ba ema nia rain” nia esplika.
Ho ida ne’e Diretór Alfandega Munisipiu Covalima Nuno Nogueira nafatin rekomenda ba iha emprezariu Timor oan sira hotu liliu iha Munisipiu Covalima ne’ebé iha kapasidade finanseiru atu bele halibur produtu lokal ne’ebé Covalima iha hodi halo export aba nasaun seluk nune’e bele kontribui ba hadi’a ekonomia rai laran.
Jornalista : Julio Salinas
Editor : Chamot Nahac
