Covalima (RCCT) 16-01-24-Tersa Feira ne’e Alfandega Munisipiu Covalima hamutuk ho unidade sira seluk halo re-intrega motorizada Vixion ida iha fronteira trestre Postu Integradu Salele, Covalima Timor Leste ba Autoridade sira iha Fronteira mota Masin ba Malaka Indonesia, hafoin ema deskonesidu na’ok motor refere lori tama liu husi dalan ilegal iha Postu Administrativu Fatumea.
Katak Diretór Alfandega Munisipiu Covalima Nuno Nogueira ba jornalista sira dehan liu husi despaixu Ministeriu Publiku Alfandega halo kordenasaun ho Beacukai Mota Masin Malaka Indonesia nian maka ohin (16/01) realiza atu atividade re-intrega motorizada ne’ebé ema lori motor husi Atambua tama mai iha area juridiku Covalima liu husi dalan ilegal iha Postu Administrativu Fatumea.
“Bazeia ba despaixu husi Ministeriu Publiku no liu husi Komando PNTL Munisipiu Covalima halo kordenasaun, liu husi kordenasaun ne’e ami halo komunikasaun ho Kepala Beacukai Mota Masin nian mak ohin loron ita bele re-intrega motor ne’ebé ema na’ok lori tama mai liu husi area Fatumea nian, tuir informasaun katak motor ne’e ema na’ok iha fulan Setembru 2023 nian, motor ne’e hafoin komando PNTL entrega mai iha Alfandega besik metade fulan ida, motor ne’ebé tama liu husi dalan legal konserteza iha dokumentasaun legal no selu taxa ba nasaun, maibe ba motorizada ida ne’e la’os importasaun baibain maibe ne’e ema na’ok mak lori tama mai foin ita nia polisia halo komunikasaun ho tentara Indonezia iha area Fatumea hodi halo kapturasaun ba motor ne’e” dehan Diretór Alfandega Munisipiu Covalima Nuno Nogueira.
Fatin hanesan Kepala Hanggar Beacukai Mota Masin,Yevika Mariany Adoe, haktuir katak hafoin motor ne’ebé lakon iha Atambua tama mai Timor Leste liu husi dalan illegal ida ne’e informasaun Beacukai Mota Masin rona husi Alfandega Timor-Leste nian.
“Informasaun ida ne’e ami rona direita husi Diretór Alfandega Nuno Nogueira rasik, hafoin rona tiha informasaun ida ne’e ami halo kedasa kordenasaun ho pihak kepolisiaan inklui vitima ne’ebé na’in ba motor lakon ne’e, hafoin koordenasaun remata ami halo kedas konfirmasaun ho Diretór Alfandega Nuno maka ohin bele realiza duni atividades reintegra motor ba Beacukai Mota Masin” nia dehan,
Enkuantu tuir informasaun katak loloos ne’e motorizada tolu maka atu re-intrega ba Beacukai Mota Masin, maibe rua la konsege tanba sei prosesu hela iha Ministeriu Publiku maibe ba motizida Vixion ne’ebé ohin reintegra ona ne’e ninia prosesu finaliza ona maka MP hatun despaixu PTNL Covalima halo Alfandega re intrega ba Beacukai Mota Masin.
Jornalista: Julio Salinas
Editor : Chamot Nahac
