Covalima (RCCT) 19-06-24-Iha Tersa Feira ne’e Servisu Alfandega Munisipiu Covalima prenda bebidas kaixa 892 ne’ebé deteta laiha lista Esportasaun ka PEB.

Diretor Servisu Alfandega Nuno Nuguera relata merkadoria ne’e importa husi kompañia Allay Diera Unipesoal.Lda husi Atambua, Indonezia mai Munisipiu Covalima Timor Leste, liu husi postu entrada Salele.

“Horseik iha loron Tersa (18/06) maizumenus iha tuku 4 : 00 loro k’raik simu informasaun husi ami nia informan sira ne’ebé servisu iha postu integradu ne’e fo informasaun katak Kompania Allay Diera Unipesoal.Lda ne’ebé hatama merkadorias mai ita nia Munisipiu Covalima liu husi Postu Entrada Salele hatama sasan hanesan Teh pucuk Harum kaixa 110, Coca-cola ho Sprite kaixa 240, Vitamina C You-C1000 Rasa Orange kaixa 542, husi sasan hirak ne’e total kaixa ne’ebé ita prende laiha deklarasaun hamutuk kaixa 892, ne’ebé oras ne’e daudaun ita nia funsionariu Aduaneru halo hela intervensaun ba sasan sira ne’e tama laiha lista, tuir informasaun ne’ebé ami hetan sasan na’in agora daudaun prosesa hela, tan ne’e maka prosesu la’o hela.” dehan Diretór Alfandega Munisipiu Covalima Nuno Noguera, ba jornalista sira iha nia k’nar fatin Postu Integradu Salele Kuarta (19/06).

Nuno haktuir Alfandega aplika ona ba kompania tenke ratifika sira dokumentus importasaun liu husi sitema hodi selu taxa normal.

“Normalmenta prosesu ne’ebé ita aplika maka sira tenke ratifikadu dokumentus sira ne’ebé iha hanesan dokumentus importasaun ne’e tenke ratifika liu husi sistema ami nian, depois ratifika hotu sei selu tasa normal no sistema maka fo direitamente nian sansaun penalidade, tasa normal tanba hare sasan ne’e tama laiha lisensa maka selu tiha tasa normal pursentu 5 ba total invoice depois maka aplika tan fali ex-size nian ne’e $ 3.00 perliter ida ne’e halo kustu tasa ne’ebé bo’ot” nia dehan.

Entretantu merkaduria ne’ebé tama iha area juridiku Covalima liu husi postu integradu Salele, liha lista Exportasaun ne’e tula iha kareta ho numeru polisia DH. 8660 JC, nune’e Servisu Alfandega Munisipiu Covalima prenda ona, hafoin simu informasaun parte servisu sekreta sira ne’ebé destakadu iha fronteira Postu Integradu Salele.